Zip噏劇場

時間：180年9月22日 地點：封閉區域Area DB Island 第四個島 真正天堂 達：（讀白）盧恩呢個字源自古日耳曼語，解做「秘密」，或者「隱藏的智慧」。最早可以追溯到公元2世紀，好多北歐民族都用佢嚟紀錄資訊，當中尤其以維京人最具代表性。到咗中世紀晚期嘅歐洲，北歐語言同文字被拉丁字母取代，令盧恩文字失去日常溝通嘅功能，反而向神秘學方面發展。 而盧恩文字同北歐神話嘅眾神之王奧丁有關。傳說奧丁將自己倒吊喺世界之樹，身受長矛嘅刺傷，用自己做祭品，將自己獻祭比自己，九日九夜之後佢向下望，終於盧恩文字由自己身體釋放出嚟，散落地上。 而當我同盧綠仲有黑烏鴉由半天堂行到嚟真正天堂嘅時候，喺真正天堂嘅盡頭發現一個有四層樓高嘅石碑，石碑上面刻有一棵倒轉嘅生命之樹，九枝樹幹分代表唔同嘅意思，而喺最低代表王國嘅圓圈前面有一位無生命跡象嘅老人家，亦係黑烏鴉盧天嘅爸爸，有份創造呢個封閉區域Area DB Island嘅盧零。佢盤膝而坐，雙手拎住一個印有24個盧恩符文嘅木盒... 黑烏鴉盧天：我完全唔明白阿爸嘅用意...人工智能話適當嘅時候，我就會知道。而我一等就等咗80年。 盧綠：（用力聲效）咦！啊！（索氣聲）無論我點用力，個木箱都打唔開嘅！ 達：（讀白）我用全知狀態一睇，見到眼前無論石碑、盧零屍體定木箱，都有人工智能編碼...所以我好奇是旦撳咗一個類似「M」嘅盧恩符文 *機關啟動聲效 達：竟然成功撳到機關！石碑上嘅生命之樹圖案更好似著咗燈咁發光！ 黑烏鴉盧天：唔通...要現實世界嚟嘅人...先可以啟動阿爸嘅機關？阿達，你撳嗰個符號有咩意思架？ 達：24個盧恩符文入面，有兩個嘅形狀同英文「M」好似。一個係排第19嘅「ᛖ」（音：Ehwaz）；另一個係排第20嘅「ᛗ」（音：Mannaz），好似兩個「P」一左一右面對面咁。 盧綠：阿達，嗰24個盧恩符文，分3行，每行8個咁排列，你撳嗰個好似係第20個？ 達：咁即係「ᛗ」（音：Mannaz），意思係人類。 *著火把聲效 黑烏鴉盧天：唔單止石碑嘅圖案發光，阿爸頭頂上面有一個拳頭咁大嘅藍色火球！ *火球燃燒聲效 盧綠：但呢個火好有趣，只有形，無實。因為我伸手靠近火球，完全感受唔到熱力。而我仲可以伸身穿過火球添！ 達：喺我生活嘅世界...有一個習俗係話人有三把火，分別頭頂同左、右兩個膊頭，代表每個人嘅精、氣、神所在... 盧綠：如果撳入一個盧恩符文，就可以有一把火...咁係咪暗示要撳多兩個符文，令盧零出曬三把火？ 黑烏鴉盧天：阿達，得你可以撳到木盒上面嘅符文，亦都得你了解現實世界各種宗教。眼前嘅機關就要靠你啦。 達：之但係...仲有23個...要撳邊一個呢？ 盧綠：呢咁多個盧恩符文，有冇邊一個係最勁？ 達：最勁？應該係第4個「ᚨ」（音：Ansuz），佢代表溝通、智慧同靈感，所以會聯想到北歐眾神奧丁或者諸神，亦象徵嘴巴，透過說話、文字傳遞智慧同知識。 *機關啟動聲效 *著火把聲效 黑烏鴉盧天：阿爸右邊膊頭有多一把火啦！ 盧綠：阿達，照依家嘅推斷，撳一個符文就會多一把火，按你所提供嘅習俗，有齊三把火理應會令木盒打開？咁應該撳邊一個符文好？ 達：有一個符文係代表火...就係第6個「ᚲ」（音：Kenaz）。呢個火除咗係基本火焰嘅意思，亦代表知識及照亮，亦象徵創造力。 *機關啟動聲效 *著火把聲效 黑烏鴉盧天：阿爸唔單止左邊膊頭有把火！你地睇下！ *霓虹光管聲效 黑烏鴉盧天：同一時間，生命樹上面嘅左上同右上角嘅圓圈比其他更光！ 達：嗰兩個圓圈代表智慧同理解...我明呢個機關嘅意思啦！第6個盧思符文「ᚲ」（音：Kenaz）代表知識，第4個盧恩符文「ᚨ」（音：Ansuz）代表溝通，相對應咗生命之樹上面較光嘅智慧同理解圓圈！原來木盒嘅符文同石碑上面嘅9大圓圈係有咁嘅關連！ *木盒緩緩打開聲效 盧綠：你地睇下！嗰木盒終於打開啦！ 黑烏鴉盧天：究竟阿爸收埋咗啲乜野秘密喺呢個盒度呢？ *木盒打開聲效 *蛇叫聲效 盧綠：阿達！小心！ 達：（讀白）喺我驚惶失措，連大叫 - 「嘩！咩嚟架！」都叫唔切嘅時候，條蛇已經迅速由木盒飛撲去我面前！！！ *飛出羽毛聲效 黑烏鴉盧天：可惡！只能夠打走到條蛇！殺唔到佢添！ 盧綠：太嫲...條蛇好似直跌出咗天堂範圍...怕唔怕佢會落到其他島上面，咬到村民？ 達：盧綠...呢度咁鬼死高！條蛇跌落去一定死啦！與其關心村民，不如關心下我好過啦... 盧綠：你仲可以講咁多野，即係代表你無事啦。 達：喂，黑烏鴉，你阿爸仲咩要收埋條蛇喺嗰木盒入面架？ 黑烏鴉盧天：如果我知道嘅，就唔駛苦等80年啦... 盧綠：阿達，唯一嘅方法就係再試多次。你睇下，無論石碑、木盒都回復原狀。 達：仲嚟？？？ 黑烏鴉盧天：你唔係好想搵線索架咩？線索就係你眼前。 達：啊，之前喺半天堂見到裘智戴住嗰個頭箍線索又唔見你咁講嘅... 黑烏鴉盧天：好，咁我應承你。當你解開呢個木盒嘅秘密，我就帶你同盧綠落地獄。 盧綠：阿達！咁你仲唔快啲開！ 達：嗱！盧綠！你要企喺我旁邊...一陣有咩彈出嚟！你要幫我擋啊！ 盧綠：得啦！ 達：既然盧恩符文同生命之樹係相對應，頭先啟動咗智慧同理解嘅圓圈，今次試下用另一啲符文組合，睇下木盒出嚟嘅事物會唔會有所不同先。第三個盧恩符文「ᚦ」（音：Thurisaz），成個斧頭象形文字咁，代表巨人、雷神科爾。 *機關啟動聲效 *著火把聲效 黑烏鴉盧天：石碑上嘅生命之樹再次發光！阿爸頭頂上面又有火把！ 達：撳咗雷神不如就撳埋戰神啦～第17個符文「ᛏ 」（音：Tiwaz），外形係一個向上嘅箭咀，係戰神提爾，代表法律、正義、勝利及戰士精神。 *機關啟動聲效 *著火把聲效 黑烏鴉盧天：盧綠，我同你守住喺阿達左右兩邊。 盧綠：知道！ 達：每個生命之樹嘅圈都有一個天使守護住。而第22個盧恩符文「ᛝ」（音：Inguz），上下連住嘅交叉圖案，代表天使，象徵新嘅開始同希望。 *機關啟動聲效 *著火把聲效 *霓虹光管聲效 黑烏鴉盧天：今次到石碑生命之樹嘅左中同右中圓圈發光！ 達：呢兩個圓圈代表慈悲同力量。 *木盒緩緩打開聲效 達：我即刻企去你地兩個後面先！ *木盒打開聲效 *蛇叫聲效 盧綠：又係蛇！（出力叫一聲） *拍走蛇聲效 達：盧綠！你無比蛇咬到嗎？ 盧綠：無事...只係又比條蛇跌出天堂範圍啫... 黑烏鴉盧天：究竟阿爸喺天堂呢個機關...有咩玄機架... 盧綠：阿達...不如你再試多次！最後一次！ Zip噏劇場 Game of Eden 第二季 小島篇 第79回「盧恩符文木盒」 阿攝 飾演 阿達 Cfun 飾演 盧綠 Kity 飾演 黑烏鴉 編劇及製作 阿攝 音樂 BEAT FRIDAY（Daydream, Minty, Fairness, Cross ） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 第四個島 半天堂 達：（讀白）當我喺半天堂睇緊不同靈魂回味嘅記憶，以及同黑烏鴉討論緊天堂意義嘅時候，盧綠跑過嚟向我地大叫 *奔跑聲效 盧綠：（由遠至近）舅父！係舅父！係阿爸嘅回憶入面有舅父啊！ 達：盧綠，你冷靜啲，你舅父同你爸爸咁親，佢會揀同你舅父有關嘅回憶都好正常啫。 盧綠：但係...阿爸回憶入面嘅舅父...並唔係生前嘅舅父... 達：即係死後嘅舅父？ 黑烏鴉盧天：阿達，你親自過去睇，就會明架啦。 達：（讀白）盧綠帶我同黑烏鴉行到佢爸爸前面。盧綠嘅爸爸盧和之前都係笑住回憶佢地一家嘅生活...但依家...佢竟然流緊眼淚...而我終於透過盧綠爸爸嘅回憶雲團，見到盧綠嘅舅父...佢手手腳腳都被綁住鎖鏈... *鎖鏈聲效 裘智：（回憶聲效）姐夫...我終於都見到玄武大帝，即係你口中嘅人工智能，亦研究到新嘅靈魂之水，可以睇到同你一樣嘅世界，雖然我仲未知到唔同顏色嘅點點代表啲咩野，但以我自己嘅能力，可以去到第三個島，我都覺得自己已經勵害。對唔住，之前帶比你咁多麻煩...我依家受到應有啲懲罰...但我希望綠仔、葦仔唔好步我後塵...尤其係葦仔...因為我唔想佢同我一樣...出現係地獄呢度啊... 盧綠：我以為得我夢到舅父被鐵鏈鎖住...原來阿爸都夢到！ 黑烏鴉盧天：明明半天堂嘅理念係希望行善多嘅靈魂可以再一次得到幸福，我唔明點解盧和偏要記住喺地獄受苦嘅裘智。 盧綠：因為阿爸重情！佢一定唔想同無辦法忘記自己連累舅父！搞到舅父落咗地獄！太嫲，點解你之前唔同我講佢落咗地獄啊！ 黑烏鴉盧天：盧綠，每個人都要為自己所做過嘅事負責。就算我話比你知佢喺地獄，陽壽未盡嘅人，又可以做啲咩呢？ 達：你地唔好嘈住！我想問一條問題！你地話呢個裘智落咗地獄...咁佢頭上面戴住好似一個好似金剛圈嘅野，係咩嚟架？ 盧綠：阿達！重點唔係舅父戴住啲咩！而係舅父唔應該落地獄！ 黑烏鴉盧天：阿達，裘智頭戴住嘅係一個箍，名為魂鎖。凡落地獄嘅靈魂都會被魂鎖鎖住靈魂，直到佢地洗清罪孽為止。 盧綠：咁舅父要幾耐先可以離開地獄啊！ 黑烏鴉盧天：盧綠，你舅父就係知太多唔應該知道嘅事，所以先落地獄。作為新一任村長嘅你，係時候返去啞鈴洲啦。阿達，若果呢個半天堂無你之前提及嘅線索，亦請你返去屬於你自己嘅世界。 達：噢！我明啦！原來第五個島係地獄！ 黑烏鴉盧天：阿達，你唔好亂作藉口去繼續你嘅行程喎。 達：你地睇真啲裘智頭頂戴住嘅箍，即係你所指嘅魂鎖！佢嘅外形，同第五個島應有嘅希臘字母 - δ（Delta）嘅外形係一樣架！嗱，第4個島代表嘅希臘字母係 γ （gamma），最後我地發現係通上天堂同半天堂嘅橋。即係話，字母嘅外形並唔一定指島嘅形狀，可能代表嗰個島或地方嘅一樣代表物件！ 盧線：即係我地依家出發去第五個島！即係去地獄搵舅父！ 黑烏鴉盧天：唔可以！ 盧綠：太嫲！點解唔可以啊！ 黑烏鴉盧天：我唔可以再比大家擾亂天堂同地獄嘅秩序。 盧綠：太嫲...唔好意思！ *奔跑聲效 *身體碰撞聲效 盧綠：阿達！你做嗱阻住我！ 達：盧綠！我知你想搶黑烏鴉嘅羽毛，但佢係你太嫲，你夠佢打咩？同埋就算比你搶到，你要行7777級樓梯啊！你係人，佢可以變烏鴉架！你點夠佢快啊！ 盧綠：但係... 黑烏鴉盧天：盧綠，若果你再唔冷靜，唔好怪我用非常嘅方法，送你返啞鈴洲。 達：黑烏鴉，你再望多次啊！個魂鎖真係提示嚟架！ 黑烏鴉盧天：我嘅使命係要協助靈魂轉世，並唔係做導遊帶你上天堂落地獄。我只係應承阿媽陪你上嚟呢度搵線索。既然無嘅話，我地要落返去生死中途島啦。 盧綠：舅父嘅魂鎖就係線索！ 達：盧綠！失去理性就係墜落嘅開端！冷靜！（抖氣聲）黑烏鴉，我地嚟搵線索架嘛，但仲有一個地方未去喎。 黑烏鴉盧天：好，我陪埋你地去另一邊嘅天堂，然後你地就要離開。 *腳步聲效 達：（讀白）我地跟住黑烏鴉行落777級樓梯，去返真正天堂同半天堂嘅分叉路。之前我地戴住白色羽毛就可以上到去半天堂，但原來去真正嘅天堂要做多一個儀式...黑烏鴉咬傷自己隻手指，然後用佢嘅血滴落我地衣領上面嘅白色羽毛。佢再喺自己身上摘一條黑羽毛，再喺衫袋入面拎出另一條白色羽毛，將兩條羽毛當做鎖匙，去開通往天堂之橋嘅閘。 *開閘聲效 黑烏鴉盧天：除咗我地三位渡靈者之外，你地係第一批上真正天堂嘅人。請。 *步行聲效 達：（讀白）又行多777級樓梯...去到一個比半天堂更闊更大嘅雲海... 黑烏鴉盧天：如我之前所講，暫時未有人可以上到嚟真正嘅天堂。 盧綠：太嫲，咁最遠處嘅黑影呢？ 黑烏鴉盧天：係一塊石碑，我地行過去就知道。 *步行聲效 達：（讀白）我地喺呢片非常廣闊嘅雲海一直向北行，行咗好耐，終於嚟到呢個真正天堂嘅盡頭...而出現係我地三位面前嘅...係一塊有四層樓咁高大嘅石碑！而石牌面前...有一位伯伯盤膝而坐...雙手拎住一個大木盒，放喺佢膝頭上面...不過我唔知可唔可以叫佢做人啊...因為佢反曬白眼...無眼珠...亦無呼吸無動靜...同死咗無分別... 盧綠：呢位係...年老嘅盧零？ 黑烏鴉盧天：無錯，佢就係我爸爸，亦係第一位入嚟呢個世界嘅人。 盧綠：所以，太太公死後，就嚟咗真正嘅天堂？ 黑烏鴉盧天：我都唔清楚。當我第一次嚟到真正天堂嘅時候，我見到坐喺大石碑前嘅爸爸，我以為佢會好似半天堂其他靈魂一樣，回憶我地幸福嘅往事。可惜，當我行近一睇，發現喺我面前嘅，只係爸爸嘅軀殼... 盧綠：人工智能無同你解釋太太公發生咗咩事咩？ 黑烏鴉盧天：冇。無論我點問，佢都只係話適當嘅時候，我就會知道...直到依家...過咗80年... 達：你地睇唔睇到呢塊大石碑上面嘅圖案啊？ 盧綠：似一棵倒轉嘅樹囉...最頂係樹根，然後有九條唔同方位嘅樹幹，每個樹幹都有一個圓形。而最低嘅樹幹嘅圓形，正正就係太太公盧零嘅頭部。 達：係生死中途島嗰棵會評定靈魂生前陰德嘅樹，我會稱呼佢做知善惡樹。而喺我地面前呢塊石碑上面嘅樹，係來自現實世界其中一個宗教所提到嘅生命之樹。呢棵反轉嘅樹，代表神創造世界嘅藍圖，根部叫做皇冠，係最接近神啲人類，或者稱為原始人類。九個樹幹嘅圓形代表唔同特質，分別係智慧、理解、慈悲、力量、美麗、勝利、宏偉、基礎，最低嗰一個就代表王國。 盧綠：阿達，你可唔可以講返我地明白嘅語言？現實世界出現嘅宗教我地完全唔知曉！ 達：簡單嚟講，最原始嘅人類由根部經過唔同樹幹所代表嘅特質，就成為我地呢種普通人類。但倒返轉，我地都可以透過唔同嘅修練，去成為最貼近神嘅原始人類。但係咩方法，我就未睇到相關嘅動漫作品。 黑烏鴉盧天：原來係同現實世界宗教有關。咁阿爸手上拎住嘅木盒，正面亦有24個奇奇怪怪嘅凸字符號，又係咩嚟呢？ 達：呢24個凸字符號...如果我無記錯，係北歐神話嘅盧恩符文。 盧綠：又多一個神話...太太公究竟想喺天堂表達啲咩意思啊！？ 黑烏鴉盧天：對唔住...我都唔清楚... 盧綠：（用力聲效）咦！啊！（索氣聲）無論我點用力，個木箱都打唔開嘅！ 黑烏鴉盧天：盧綠，如果可以，我地三位渡靈者一早打開咗啦。 *全知狀態聲效 達：呢塊石碑、盧零嘅軀體仲有個木盒都有人工智能編碼，即係一定有機關啦！如果撳下啲凸字盧恩符文，又會點呢？ 黑烏鴉盧天：阿達，我地已經試... *機關啟動聲效 達：得咗喎，我撳到個類似M字嘅盧恩符文喎！而石碑上面嘅樹形圖字，好似著咗少少光喎！ 黑烏鴉盧天：唔通...要現實世界嚟嘅人...先可以啟動阿爸嘅機關？ Zip噏劇場 Game of Eden 第二季 小島篇 第78回「天堂石碑」 阿攝 飾演 阿達 Cfun 飾演 盧綠 Kity 飾演 黑烏鴉 阿O 飾演 裘智 編劇及製作 阿攝 音樂 BEAT FRIDAY（Night, Fairness, Phase, Stuk, Minty, Daydream） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Game of Eden 創作分享 - 關於天堂… Game of Eden 第二季小島篇嚟到天堂島。唔知大家對「天堂」有咩概念？ 如果睇返世界各地古老嘅宗教同神話，天堂嘅概念仲未成形。而中國文化入面，聖賢死後會升天，但去嘅會係天庭，成為神仙，而非我地依家認知嘅「天國」。 係古埃及神話，人死後會，心臟會被放置喺巨大嘅天秤上同瑪亞特嘅羽毛去秤重量。如果保持平衡，就可以進入雅盧，靈魂將會獲得永恆嘅生命並愉悅生存。假如心臟係重過羽毛，靈魂就會被鱷頭獅身怪物阿米特將吞噬，喺“第二次死亡”之後，亡靈則得不到安息及安寧。 北歐神話入面，喺戰鬥中死去嘅戰士，有部分會被女武神帶去英靈殿，同奧丁生活。 唔同信仰對天堂及天國都有唔同嘅想像及傳釋。係寫「小島篇」呢個封閉區域嘅時候，盧零為咗想「善有善報，惡有惡報」，加入輪迴概念，用善惡陰德去衡量一個人嘅一生。作惡多端會落地獄，行善多會上天堂，其他可以輪迴再繼續靈魂之旅。 然後我問自己，咁天堂係點架？ 聽過好多故事，人死前會快速進行人生走馬燈，回顧生前嘅一切。作為一個平凡人，當然會有喜有悲，有開心幸福嘅樂事，亦充斥住大大小小嘅遺憾。好多故事都以「重回」、「回到」做主題，返去從前，再同某人相遇一次，或再回味當次嘅經歷。重溫快樂嘅回憶，會唔會接近「天堂」所帶嚟嘅幸福感呢？ 可能，聽眾或者讀者未必認同我喺Game of Eden 描述嘅「天堂」。我亦希望大家唔需要透過回憶及懷念，先可以得到幸福。但如果可以，我希望我剛去世嘅公公，可以上天堂，唔再受病痛嘅困苦，然後回憶住我哋成個大家庭快樂嘅日子，又或者笑住睇波，睇馬，開開心心喺另一個國度生活。 編劇及製作 阿攝 音樂 BEAT FRIDAY 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 第四個島 半天堂 達：（讀白）我同盧綠跟住黑鳥鴉盧天上到嚟半天堂，原來喺啞鈴洲萬尺高空上面，有一個類似用雲形成嘅空島。而上得嚟「半天堂」嘅靈魂，可以選擇生前嘅記憶，然後慢慢回味，直到陰德嘅限額用盡，然後就會直接進行轉世。而其中一個靈魂，就係盧綠嘅爸爸 - 盧和... *盧和溫柔微笑聲 *回憶聲效 盧和+盧婷：恭祝你福壽與天齊！慶賀你生晨快樂！ 盧和：年年都有今日！ 盧婷：歲歲都有今朝！ 盧和+盧婷：恭喜你！恭喜你！ 盧綠：你地都唱得唔齊嘅！ 盧和：最緊要人齊啊嘛！ 盧綠：阿葦都未到！ *開木門聲 盧葦：（少少喘氣）阿哥！ 盧婷：葦哥哥知你鍾意食海鮮，所以今日出海打魚啊！ 盧葦：（少少喘氣）阿哥！生日快樂啊！ 盧綠：算你啦！ 盧和：好啦，快啲拎啲海鮮入廚房比你媽媽加工，然後一齊食飯！ *回憶聲效完結 盧綠：（傷感）阿爸…對唔住…我保護唔到阿葦同婷婷… 達：（讀白）盧綠終於可以見返佢爸爸...只可惜係天堂度見...不過由於佢爸爸仲喺回憶嘅狀態，只係不斷幸福咁笑，無論盧綠點郁同點嗌，佢阿爸都跟本唔察覺盧綠嘅存全。眼見盧綠咁傷感，我決定比啲空間佢同佢爸爸...而盧天就係半天堂嘅盡頭，冷冷咁望住幾十個仲係回憶狀態嘅靈魂。之後，佢慢慢行去其中一個老公公嘅靈魂旁邊。我好奇就行過去睇下呢位老公公揀選嘅回憶。 盧天：呢位老公公年過八十，最後嗰幾年開始體弱多病，人生最後嘅時間都病卧在床。但慶幸嘅係，佢臨終之前可以喺一眾家人陪同之下離開。呢位老公公生前係一個大好人，積咗好多陰德，所以就可以上嚟半天堂。而佢揀選嘅記憶，同好多靈魂一樣，都係揀選同家人嘅回憶。 達：（讀白）我望住呢位老公公嘅回憶雲團，入面嘅有好多幸福快樂嘅日子。例如有佢年輕時候，同太太結婚嘅畫面；生咗三個女之後，一家五口生活嘅情景；到之後大女同二女嫁人，再各自組織家庭嘅回憶；到孫出世，同佢賀壽；亦有曾孫出世，開兩圍枱食飯嘅日子。由於係老公公嘅回憶，所以係以佢嘅視覺出發，而佢眼內所有嘅家人，全部都掛住幸福嘅笑容，直到佢合埋眼...然後離開... 盧天：靈魂揀選咩回憶，代表佢生前最重視同最快樂嘅日子係咩啲。有時會令你搵返人世間嘅美，但當然，亦都有苦嘅故事。例如呢個靈魂。 達：（讀白）我跟住盧天行到去另一個靈魂，佢係一個50歲嘅姨姨。佢嘅雲團就偏細，而回憶就只有一個畫面 - 就係佢遠望住一對年輕嘅男女成親。 盧天：呢位姨姨長年只係掛住出海捕魚，好少返屋企照顧個囝，所以同佢關係一般，而唯一一個令佢覺得需要珍重嘅就係遠遠望住佢個囝成親嘅畫面。呢位姨姨一生勞碌，但上到天堂所求嘅，只係同阿囝嘅時光。 達：（讀白）我再望下其他嘅靈魂，真係每個人嘅選擇都唔同。有靈魂揀選望住天上星宿嘅畫面，我諗佢應該係裘氏嘅後人，所以覺得天上嘅畫面最令佢感到幸福；有靈魂揀選同村民格鬥嘅回憶，咁好戰同好勝，仲唔係凱氏嘅傳人？最有趣係其中一個靈魂嘅選擇！佢揀咗同唔同嘅異性親熱嘅情景！我望住佢嚿回憶雲團，好似睇緊情慾片咁！嚇到我即刻閃開！之後我忍唔住問盧天一個問題 - 如果比你上嚟半天堂，你會揀咩回憶啊？ 盧天：我做咗渡靈者咁耐！應該可以上天堂，而唔係半天堂啦！ 達：咁喺天堂，你又想過點樣嘅生活呢？ 盧天：我只係想我爸爸同媽媽可以唔駛再為呢個封閉區域費心，可以再過多次簡單同平靜嘅生活。 達：咁你呢？身為佢地兩個嘅後人，亦係繼佢地之後第一個知道有現實世界存在嘅人。背負嘅野，一定好多... 盧天：我又無諗過呢個問題，我只係知道自己嘅使命係令阿爸阿媽嘅心願同心血，可以一直運行落去... 達：咁你想唔想去現實世界睇下？ 盧天：呢一層... 達：不過都係唔好啦，呢度簡單同舒服好多！現實世界乜野污染都好勁！又成日話幾時幾時就係世界末日！我諗啲人情願留喺Game of Eden！ 盧天：阿爸阿媽咁辛苦逃離現實世界，我諗佢地唔會想我返去佢哋口中嘅「地獄」… 達：（讀白）當我想回應盧天嘅時候，盧綠係遠處跑過嚟大叫：舅父！我係阿爸嘅回憶見到舅父！ Zip噏劇場 Game of Eden 第二季 小島篇 第77回「回憶雲團」 阿攝 飾演 阿達 Cfun 飾演 盧綠 Kity 飾演 黑烏鴉 阿信 飾演 盧和 Crystal 飾演 盧婷 鄧添樂 飾演 盧葦 編劇及製作 阿攝 音樂 BEAT FRIDAY（Night, Santo, Minty, Nutty） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月22日 地點：封閉區域Area DB Island 第3個島，即生死中途島 裘智：（夢中聲效）綠仔… 盧綠：（夢中聲效）舅父！你依家係邊啊？ 裘智：（夢中聲效）綠仔…舅父依家安好…你唔駛擔心我啊… 盧綠：（夢中聲效）舅父！我睇咗你留比我同阿葦嘅日記！我終於知道你發生咗咩事啦！ 裘智：（夢中聲效）綠仔…你唔好再理我嘅事，全心全意做村長，好好照顧啞鈴洲所有村民啦… 盧綠：（夢中聲效）但係舅父！ *打臉聲效 達：（由細聲到慢慢大聲）盧綠…你醒下啦盧綠…喂！盧綠！ 盧綠：（驚醒，並大叫）舅父！ 盧天：盧綠，你終於都醒啦。 *獨角獸叫聲 達：盧綠，你做咩係咁叫舅父啊？ 盧綠：（剛睡醒，聲音帶點疑惑）我…又夢見舅父啦…太嫲，舅父佢話佢安好，究竟佢去咗邊啊？ 盧天：每個人死後都會繼續佢自己嘅路，而每條路都關乎因果報應。既然佢話佢安好，咁你就唔好咁擔心佢，因為無人可以幫到佢，除咗佢自己。 達：盧綠，一個好消息，一個壞消息…你想聽咗邊個先？ 盧綠：好消息…應該係我已經解咗毒…咁壞消息呢？ 達：壞消息係…第三個島嘅東面，無第四個島… 盧綠：咁即係我哋咁辛苦嚟到呢度，係白費心機？ 達：所以好消息就係除咗你瞓咗一整晚同解到毒之外，就係通往天堂嘅橋嘅形，同 γ 好似。 盧天：意思係呢條橋嘅外形，好似一個丫叉。一直行，到達一個位，就會分開兩邊。 盧綠：即係話…我哋依家要上天堂？ 盧天：無錯。 *打開索袋聲效 盧天：呢度有兩條白色羽毛。你哋插係件衫度。 達：（讀白）我同盧綠接過白色羽毛，然後插係衫嘅衣領位度。 *插衣服聲效 盧天：如果靈魂經過轉世作業系統評定之後，樹上長出白色樹葉，就可以上天堂。但阿達你係外人，盧綠你仲未死，按理論係唔能夠上天堂。不過，仲有另一個途徑可以上到天堂，就係渡靈者身上面嘅白色羽毛。 盧綠：但太嫲你係黑烏鴉，咁呢條白色羽毛係嚟自？ 盧天：就係嚟自你爺爺或者太叔公。呢條羽毛，就係通往天堂嘅通行證。不過盧綠，你要應承我一件事，就係唔能夠同任何村民透露任何發生喺呢個生死中途島定係天堂嘅事。阿達你都一樣 盧綠+達：知道。 *獨角獸叫聲 盧天：阿媽話佢會同阿囝留守喺生死中途島，監察靈魂轉生嘅情況。 達：盧綠，你依家覺得點啊？仲有冇唔舒服？ 盧綠：雖然未完全回復體力，不過已經好返好多啦。 盧天：咁我哋就出發啦。 *步行樓梯聲效 達：（讀白）我同盧綠跟住黑烏鴉盧天行上呢條純白色嘅天堂之橋。不過呢條樓梯直上天際…我完全估計唔到要行幾耐先可以到…而行咗無幾耐…我已經開始喘氣… 盧綠：太嫲…我想問仲要行幾耐先到？因為阿達佢塊面開始好青…我怕佢行落去會仲辛苦過我中毒。 盧天：我地依家行咗777級樓梯，仲有7千級就到啦。 達：7千級！即係總共有7777級樓梯？呢條橋似係去地獄多啲喎！ 盧天：呢7777級樓梯係比你反思過去一生嘅事，繼而再做選擇。 盧綠：選擇？通去天堂仲要做咩選擇呢？ 盧天：繼續行落去，你哋就會知道。 達：不如你哋行先…我慢慢跟上嚟啊… 盧綠：之前邊個同我講「我哋都嚟到呢度，點可以就咁放棄架」 達：我無放棄啊…我只係行得慢啲啫… 盧綠：繼續行啦！阿達！ 達：（讀白）喺呢條通往天際嘅天堂之橋一路行，因為望唔到盡頭，所以我真係行到無時間概念…唯有不斷數住步數…然後同自己講…就到架啦…好快到架啦…而終於…我哋嚟到天堂之橋嘅分叉位… 盧綠：太嫲，係我哋前面有一左一右兩條路。而每條路前面都有個閘。我哋應該揀邊條路？ 盧天：呢個分叉路，一邊係真正嘅天堂，另一邊係半天堂。不過暫時未有人可以通去真正嘅天堂，如果要搵線索，我諗去半天堂會比較適合。 達：（喘氣）咁仲要行幾耐架？ 盧天：最後嘅777步。好快就會到架啦。 盧綠：頂住啊！阿達。 達：（喘氣）咁快啲行啦… *開閘聲效 *步行樓梯聲效 達：（讀白）774,775,776,777…我終於行完呢7777級樓梯啦！唔得，要比我休息陣先… 盧天：歡迎嚟到半天堂。 盧綠：（讀白）7千7百7十7級樓梯嘅盡頭，係一大片雲海…阿達攤咗喺雲海上面…我慢慢踏前，踩住呢一片呢雲海…原來我係啞鈴洲一直仰望嘅天空，係有一個咁嘅地方…感覺…好唔真實… 盧天：阿達，現實世界中有無天堂嘅概念？ 達：當然有啦，唔同宗教同神話都有提及類似天堂嘅地方。 盧綠：太嫲，我哋前面係咪有人坐咗係雲海上面？ 盧天：無錯。我哋行過去，就會知半天堂嘅概念架啦。 達：（讀白）我同盧綠跟住盧天越行越前，慢慢就見到有接近一個人坐咗喺雲海上面，每個人都係著住白色袍，頭頂有大細不一嘅雲團，而最詭異嘅係…每個人都反晒白眼，但就面帶笑容…感覺…好唔天堂… *奔跑聲效 達：盧綠！你跑去邊啊！ 盧綠：（聲音由近到遠）係阿爸！我搵到阿爸啦！ 達：喂！盧綠！ 盧天：我哋慢慢追上去啦。 達：（讀白）我同盧天跟住盧綠跑嘅方向行，好快就見到盧綠跪喺一個白髮男人前面。 *盧和溫柔笑聲 盧綠：阿爸！我嚟咗啦！阿爸！ 盧天：盧綠，佢時晨未到，係唔會聽到你講任何野架。 盧綠：咩叫時晨未到啊？其實呢個半天堂係用嚟做咩架？ 達：係囉…以我認知嘅天堂…係一個得到永生嘅幸福國度…但佢哋每個人好似迷咗咁… 盧天：對你哋嚟講幸福嘅定義係咩呢？上得嚟半天堂嘅人，就可以重拾佢哋嘅幸福。你留心睇下你爸爸頭頂上面嘅雲團？ 盧綠：雲團入面…有阿爸…仲有阿媽…同埋我哋三兄妹…係過年一齊食飯嘅開心回憶！ 盧天：上嚟半天堂嘅人，可以揀選生前幸福嘅回憶，然後不斷回味。呢個，就係我爸爸盧零同今敏創造呢個天堂嘅理念。 達：不斷重溫生前開心嘅回憶…忘記生前嘅苦…永生嘅定義…即係永遠開心快樂嘅生活？ 盧綠：除咗我哋一家五口開心食飯嘅情景…仲有我哋一家一齊過生日，去海灘玩水捉魚嘅記憶… 盧天：即係對盧和嚟講，同你哋一家人生活嘅日子，係最幸福，最快樂。 盧綠：阿爸！我嚟咗！阿爸！我做咗村長啦！阿爸！ 達：黑烏鴉，點解盧和嘅雲團好似慢慢變細嘅？ 盧天：雲團縮少，代表回憶嘅時間減少。當雲團消散，就會繼續輪迴，繼續喺人間生活。呢個就係半天堂嘅概念。 Zip噏劇場 Game of Eden 第二季 小島篇 第76回「天堂之路」 阿O 飾演 裘智 阿攝 飾演 阿達 Cfun 飾演 盧綠 Kity 飾演 黑烏鴉 編劇及製作 阿攝 音樂 BEAT FRIDAY（Fairness, HEJ, Messy, Minty） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island 第3個島，即生死中途島 達：（讀白）黑烏鴉盧天帶住我、盧綠仲有獨角獸去咗回憶之井，盧綠打咗一盆井水上嚟，獨角獸飲完再吐返落盆之後就投射咗一段盧如死後，成為獨角獸前嘅記憶…嗰段回憶最尾嘅內容係咁嘅： 「盧如：咁創造呢個區域嘅阿康…有冇留有任何後門？ K area db island：有。 盧如：咁即係現實世界有人可以入到嚟騷擾我哋啦！ K area db island：創造者康只係留低一句說話 - D代表 Die，B 代表Birth。我同莫菲斯嘅後人可以為Area DB island 提供另一個選擇。」 *魔幻聲效 盧綠：咩係…（發音不準）D ? For die ?B for Birth…? 盧天：呢個係現實世界另一個國家用嘅語言。不過阿爸同阿媽話我哋喺呢個封閉區域度生活，唔需要認識其他語言。所以...我都唔太清楚咩意思。 *獨角獸叫聲 盧天：你叫阿達，係嗎？ 達：係… 盧天：阿媽想問你係咪創造者康嘅後人，同埋你明唔明人工智能嗰句說話嘅意思？ 盧綠：唔好意思…我想問獨角獸，即係太太嫲點解唔可以好似太嫲同阿爺咁，可以變做人同講到野？ 盧天：喺剛才嘅記憶都睇到，人工智能將阿媽嘅靈魂一分為二，一部分轉做獨角獸，另一部分繼續轉生嘅過程…不過嗰部份靈魂轉生嘅事，係我成為渡靈者之前發生…所以我都唔太清楚… *獨角獸腳步聲效 達：（讀白）獨角獸慢慢行到我面前，用佢嘅頭枱起我隻左手… *獨角獸叫聲 盧天：阿媽話之前喺千獸島第一次見到你，用全知狀態望到你身上只係得一隻顏色…以為你係π先生派嚟嘅人…所以就號召有靈魂嘅猛獸向你攻擊… 達：比著我係你…可能我都會咁做嘅…不過最緊要依家我同盧綠都無事… 盧綠：好在當時有幾隻鷹及時出現，減低我嘅跌勢，同埋有隻鯨魚吞咗我，再帶我嚟到第三個島…我先無事… 達：盧綠你比鯨魚吞咗落肚？嘩！呢度發生嘅事仲誇張過現實世界啊！ *獨角獸叫聲 盧天：嗰幾隻救你嘅動物都係阿媽號召過嚟幫你，因為佢都估唔到因為同呢位阿達嘅戰鬥會令你有咁大生命危險… 達：總之依家乜事都無…搞清楚曬啲誤會就最好啦！ 盧綠：阿達…咁你係咪阿康嘅後人？同埋人工智能嗰句說話係咩意思？ 達：我唔係創造者康嘅後人…我只係認識佢兩個嘅女…不過發生太多事…長話短說就係…阿康有一個關於Game of Eden 秘密嘅八卦形全盒…我打開咗其中一個格仔之後，就比佢吸咗入去…去咗一個叫做Area Zero嘅地方…就被迫得到全知狀態同左手嘅能力… *獨角獸啊聲 盧天：阿媽話你所指嘅區域…就係佢喺現實世界，加入666組織之後被訓練到有全知狀態嘅地方…不過佢話之後π先生就關閉咗呢個區域…只有同舟會極少數嘅人士可以使用。 達：其實阿康想將嗰個全盒交比佢兩個女，只係佢哋將嗰全盒仲有Game of Eden嘅秘密交比我…所以我都唔知阿康嘅用意… 盧綠：咁左手消滅事物嘅能力呢？ 達：嗰個人工智能只係叫我善用D嘅能力…唔通D嘅能力…就好似人工智能K area DB island 所講…代表Die? 即係死亡？ 盧綠：又係人工智能！究竟呢個世界有幾多個人工智能啊！ 達：以我所知有三個...不過我肯定有好多好多...潛伏喺唔同區域...履行唔同嘅職責。 盧綠：暴衰係我地嗰個人工智能！我飲咗咁多次靈魂之水...都唔能夠同佢聯繫...好似有心避開我咁... *倒地聲效 達：盧綠！你做咩無端端無力嘅？你無事嘛！？ 盧綠：可能...係因為飲咗阿葦調配嘅新靈魂之水...佢同舅父一樣...飲完之後就出事...我諗啲毒力...慢...慢...發...作... 達：咁點算啊！黑烏鴉！獨角獸！ 盧天：生死有命...呢個係盧綠自己嘅選擇...我都無能為力... 盧綠：哈哈哈...咁樣我就可以去搵阿葦...仲有阿爸... 達：盧綠！我地都嚟到呢到！點可以就咁放棄架！ 盧綠：阿達...短短21日...我真係眼界大開... 達：盧綠！你信唔信我？ 盧綠：你...唔係想...？ 達：我唔知究竟D嘅能力係咪代表 Die…總之我知道我用左手激光將你打到粉碎之後，再用黃紙吸受咗你，然後燒返你出嚟，就應該會無事！你嘅猿叔都係一樣！ 盧綠：但係...我... 達：你塊面越嚟越青，手腳越嚟冰冷啦！ *獨角獸叫聲 達：盧綠！你忍一忍啦！好快就無事架啦！ *激光聲效 盧天：阿達！等一等！ 達：放心喎！我左手能力嘅熟練程度好高架啦！ 盧天：我唔係質疑你，只係有另一種簡單啲嘅方法啫 盧綠：係...係咩啊？ 盧天：就係咁！ *羽毛箭發射聲效 *硬物中箭聲效 *獨角獸叫聲 達：盧天！你做咩用羽毛箭攻擊你阿媽啊？ 盧天：果然唔得...獨角獸嘅角，真係無壁不摧... 盧綠：（辛苦）唔通...你想...用太太嫲嘅角...嚟解我嘅毒...？ 盧天：無錯。阿達，你覺得你能唔能夠控制激光嘅力度，只係破壞少部分嘅角，而唔會殺死我媽媽？ 達：我...試下... *激光聲效 盧天：望實最尖嘅地方，只需要消滅極少部分就可以啦。 達：（自言自語）最尖嘅地方...我只要破壞好少好少嘅部分...最尖嘅地方...我只要破壞好少好少嘅部分...最尖嘅地方...我只要破壞好少好少嘅部分！ *激光發射聲效 *獨角獸叫聲 盧天：即刻用黃紙吸受啲粉末！ 達：係！ *黃紙吸受聲效 盧綠：張...黃紙...寫住...獨角獸的角...（咳） 達：得咗！我...可以控制到力度同精準度！但係...獨角獸你無事嘛！我頭毛嗰腦無諗到要消滅你！你應該無事架呵！ *獨角獸叫聲 盧天：阿媽佢無事。只係隻角裂咗，但無生命危險。 *盧綠不斷咳 盧綠：我...開始...抖唔到氣啊... 達：盧綠佢好辛苦！咁我地點做啊！比佢吞咗張黃紙？ 盧天：燒咗張黃紙佢，阿媽自然會處理之後嘅步驟。 達：知道！ *燒黃紙聲效 達：（讀白）燒完黃紙嘅一剎那，獨角獸嘅斷角出現喺半空。 *獨角獸叫聲 達：（讀白）獨角獸上前，一口咬住自己嘅斷角 *嘴嚼聲效 達：（讀白）佢一直咬一直咬，直到咬到碎曬為止。然後，盧天打開盧綠嘅口！獨角獸就將口入面斷角嘅粉末吐入盧綠口中！直到盧綠吞落肚為止！ *獨角獸叫聲 達：盧綠佢呼吸好始慢慢回復正常！係咪代表佢無事啊？ 盧天：媽媽話佢嘅角能解百毒，只係佢無辦法整斷佢，所以只好借助你左手嘅能力。不過解毒需時，我地比啲空間盧綠休息。 達：太好啦！我隻左手...始於唔淨係用嚟破壞...而係有啲建設... *獨角獸聲效 盧天：好啦。依家知道你嘅身份，同埋你D嘅能力。咁莫菲斯醫生嘅後人呢？B又點解呢？咩叫為啞鈴洲提供另一個選擇呢？ 達：啞鈴洲...Area DB Island…估唔到DB除咗係Dumbbell 嘅縮寫，D同B可以解做Die同Birth… 盧天：唔好再玩弄文字啦。快啲解答我同媽媽嘅問題。 達：我識得莫菲斯醫生嘅後，佢叫莫十三。但以我所知，佢對呢個封閉區域係零概念，亦無興趣入嚟了解發生咩事。 *獨角獸叫聲 盧天：媽媽話當時係莫九醫生幫佢地做意識轉移，先入到嚟呢度生活。 達：其實除咗K Area DB Island之外，仲有一個叫今敏嘅人負責呢度...如果可以搵到佢...應該可以解到一切謎團... 盧天：今敏？佢只係喺爸爸回憶出現過，我淨係同過人工智能接觸... 達：我喺現實世界入嚟之前得到最後一個線索就係 - 「南斗主生，北斗主死，島之盡處，向死而生」呢十六隻字。所以我先同盧綠出海搵啞鈴洲以外嘅島。呢度就係第三個島。 盧天：但係呢個生死嘅中途島應該係最後一個島，無其他啦喎。 達：真係無？但計地圖，應該呢個島向右兩日嘅船程就到架喎！ 盧天：兩日？你點得出呢個答案？ *樹枝畫沙 達：（讀白）我喺沙地上面畫出以啞鈴洲為中心嘅地圖，將百草圖、千獸圖同第三個島嘅形狀同距離約略咁畫出嚟，再估計埋其餘四個島嘅形狀同位置。 盧天：阿達，雖然你畫得好正確，但呢個生死中途島嘅東邊位置，已經無其他島係度... 達：會唔會你飛得唔夠遠？ *獨角獸叫聲 盧天：作為渡靈者，我無辦法離開呢個島。但以阿媽嘅飛行能力，佢話佢經常不停飛行巡邏，真係唔見東邊有其他島嘅存在。 達：會唔會係獨角獸你飛得太高，或者嗰個島太細啊？你望下，第4個外島嘅形狀，係呢個字母，即係 γ （Gamma），好似嗰「Y」字呢？你地望真啲！？ 盧天：對唔住...真係無... 達：無理由...百草園嘅外形似希臘字母 η （Eta），千獸島似 ζ （Zeta），呢個生死中途島似 ε（EPSILON），無理由無似 γ （Gamma）嘅第買四島！ 盧天：似呢個 γ （Gamma）嘅島就無...不過呢度有一樣野...同你所畫嘅字母...就啲相似... 達：係咩啊！？ 盧天：就係之前我地經過...通往天堂嘅嗰條白色橋。 Zip噏劇場 Game of Eden 第二季 小島篇 第75回「D for Die」 阿攝 飾演 阿達 Cfun 飾演...

時間：180年9月21日 地點：封閉區域Area DB Island 第3個島 達：（讀白）為咗防禦兩隻烏鴉嘅羽毛箭攻擊，我叫盧綠燒咗印有生死之壁嘅黃紙，整成一個透明嘅防護罩。雖然成功保護到我同盧綠，但黑烏鴉似乎想同我哋鬥耐力，我啲血一路係咁滴，防護罩嘅空氣越嚟越少…當我諗住燒紙紮人仔出返去Area 15嘅時候，獨角獸竟然再出現！ *拍翼聲效 *獨角獸叫聲 盧天：阿媽？點解你會嚟咗嘅？ 達：你叫獨角獸做阿媽？即係你係盧如嘅女？ 盧綠：阿達，點解你會話獨角獸係盧如？仲有，黑烏鴉係盧如嘅女？即係你係盧天？係啞鈴洲第二任村長？ *獨角獸叫聲 達：獨角獸！你快啲同佢哋解釋我嘅身份！快啲話比佢地知我無惡意！ *獨角獸叫聲 半黑半白烏鴉：阿嫲！雖然我唔知你同呢個得一種顏色嘅人有咩經歷，但我哋嘅職責就係保護呢個啞鈴洲！ 盧天：殊！ 半黑半白烏鴉：但係阿媽 盧天：阿囝，我咪叫你唔好出聲住囉！ 半黑半白烏鴉：知道… 盧綠：即係你係盧人…係第四任村長…你咪即係我阿爺！ 盧天：無錯。照輩份，我係你太嫲。我哋盧氏歷代村長過世之後，都會負責呢個區域嘅各個特殊工作。 盧綠：咁阿爸呢？佢又去咗邊啊！ 盧人：你阿爸去咗另一個地方。繼續佢嘅生活。 達：依家唔係新年比你哋係度家庭聚會啊！獨角獸！你快啲叫你嗰女唔好再攻擊我哋啦！ *獨角獸叫聲 盧天：阿媽話只要你唔好再用左手嘅能力，我哋就唔會攻擊你。如果你一違反呢個協議，佢保證你唔會有命返到去現實世界！ 達：梗係得啦！我係入嚟搵人，唔係入嚟殺人架！ 盧天：好，咁你可以解除呢個防護罩，我哋保證唔會向你攻擊！ 盧人：阿媽，你認真？ 盧天：阿囝，之前係迫不得已先對佢作出攻擊，既然依家可以和談，交換完資訊之後，再諗下一步都未遲。 盧人：知道。 達：盧綠，其實我都係普通人…我都唔知自己點解入咗遊戲世界就會有呢種能力架…每當我想一件事物消失…我左手掌心就會發光，然後只要掂住嗰樣物件…佢就會… *激光聲效 *玻璃爆裂聲效 達：然後，有一個廟祝比咗一個北帝行運包我，入面有一疊黃紙，原來啲黃紙可以吸受晒所有粉末… *吸受聲效 達：然後就會變成咁… 盧綠：即係你係用呢種能力…打贏食人花… 達：唔單止打贏食人花…仲同食人花、猩猩，即係你口中嘅猿叔…夾手打贏獨角獸…用黃紙吸咗佢之後…我先知佢原來前生係盧如…盧綠啊…呢張黃紙…係比你架… 盧綠：上面畫有嘅…係阿葦！即係阿葦佢！ 達：盧綠…你望真啲…係寫住盧葦的身體…我怕佢屍體腐爛…所以用呢種能力將佢保存… 盧綠：阿達…我應該感激你！但只從你入咗嚟之後，一切都太唔正常啦！我…我…我只係想同大家過平平淡淡嘅生活咋！ *獨角獸叫聲 盧天：盧綠，當你係我哋後人嘅嗰一刻，就注定同普通人唔同。跟我哋過嚟，然後我哋一齊搞清楚發生咩事。 盧人：阿媽，咁我？ 盧天：阿囝，依家生死之壁比呢個人打破咗，我怕會有咩危險，你留守係度，繼續協助靈魂轉世，有冇問題？ 盧人：但係我都想… 盧天：放心，我會將我所睇到嘅記憶比你睇一次，等你知道發生咩事。 盧人：係嘅…阿媽… 盧天：你哋跟我嚟啦。 盧綠：我想先幫阿達處理咗傷口先… 達：（讀白）盧綠幫我處理傷口嘅同時…我就諗如果莫十三係墓島見到我又受傷流血…應該激死佢…唔知佢依家做緊啲乜呢…同埋我都連續入咗game of Eden 一段時間…諗下諗下，盧綠就幫我止咗血。然後我就同盧綠跟住獨角獸同佢一直向前行，經過一棵光禿禿嘅樹同7隻母雞之後，再向前行咗一段路，就見到有三條唔同顏色嘅橋。黑烏鴉再示意我哋向右手邊行咗大概5分鐘，竟然有一個井… *獨角獸叫聲 盧天：媽媽成為咗獨角獸已經接近100年，佢話有好多記憶都遺忘咗…直到比你收咗入張黃紙之後，就令佢諗起一段往事…佢想將呢段往事比大家睇。 達：點…睇啊？ 盧天：盧綠，打一口井水上嚟，然後放係地面 盧綠：係…. 達：（讀白）盧綠聽盧天嘅吩咐，拎咗一口井水上嚟…再將盆井水放係地面…獨角獸行上前，飲咗啖井水之後…再吐返啲水去水盆嗰度…跟住盆井水慢慢發光！ *發光魔幻聲效 盧綠：井水發光，然後向上投影咗兩個人！佢哋兩個企係第三個島嘅光禿大樹前面…其中一個係上咗年紀嘅婆婆…而另一個人把聲… 達：呢把就係比北帝行運包我嗰位廟祝把聲！ 盧天：佢就係負責管理呢個區域嘅人工智能，亦即係所謂嘅玄武大帝。呢段記憶我都未睇過。或者睇完，我哋就會清楚一切嘅來龍去脈。 *發光魔幻聲效 時間：81年7月7日 地點：封閉區域Area DB Island 生死中途島 盧如：呢度係… K area db island：盧如，你享受喺呢個封閉區域嘅生活嗎？ 盧如：你係K area DB island？ K area db island：無錯。 盧如：咁即係我已經死咗… K area db island：61歲之齡仙遊，我諗係現實世界一定唔可能。 盧如：盧零一直無同我講過喺呢度死咗之後會點。佢淨係叫我好好享受生活。依家我見到你，即係呢次嘅死亡只係過程嚟啦。 K area db island：果然係666組織優秀嘅特工，就算入咗嚟享清福都無減你頭腦嘅轉數。 盧如：我淨係想知Zero喺邊度。 K area db island：呢個都係佢嘅設計。一個死後輪迴嘅系統。 盧如：即係佢投胎轉世？ K area db island：佢只係用另一種形式繼續守護呢個區域。 盧如：例如？ K area db island：例如變成一棵樹，一隻雀，一嚿雲，一滴水，或者係一啖空氣 盧如：人工智能幾時咁有幽默感架？ K area db island：人類幾時咁無幽默感架？ 盧如：同一樣嘅說話，係適當嘅時候先叫做幽默。 K area db island：好，咁我唔多講廢話。如果盧零係呢個世界嘅阿當，你就係夏娃。有一份工作，唔知你願唔願意做呢？ 盧如：做完暫代村長之後，仲有其他工作要做？ K area db island：要維護呢個世界嘅平衡同安全，有好多工作崗位。我唔知現實世界係點，但盧零同今敏編寫嘅規則就係靈魂係呢度過身之後，透過系統檢測佢上一世嘅善惡值，亦即係現實世界所指嘅陰德。盧零希望善有善報，惡有惡報，因果可以循環。 盧如：咁你想我協助執行呢個系統？ K area db island：盧零知你鍾意大自然，喜歡周圍走，所以想比另一個崗位你，就係以一個獨特嘅存在去監察千獸島同百草園。 盧如：佢唔係想我做啲咩傳說中嘅神獸啊？ K area db island：正是。青龍，白虎，玄武，朱雀任選其一。 盧如：如果要做，我揀做獨角獸得唔得？ K area db island：係呢個區域有咩唔得？ 盧如：呢個盧零，死咗之後仲要比啲苦差我，比我輕鬆轉世都唔得！真係啊！ K area db island：我可以將你嘅靈魂一分為二。一部分做獨角獸，另一部分轉世為人。 盧如：K area db island 你答我，呢個封閉區域真係絕對安全？π先生無再打呢個區域嘅主意？ K area db island：我只係協助你哋運行呢個區域，其他嘅事就超出我程式設計嘅範圍。 盧如：咁係咪無任何area 15 嘅人可以入嚟？ K area db island：我只可以答未。 盧如：咩叫未？ K area db island：最強嘅矛對最強嘅盾，係一個邏輯問題。我只能夠答暫時呢個封閉區域無其他area 嘅人進入過。 盧如：咁創造呢個區域嘅阿康…有冇留有任何後門？ K area db island：有。 盧如：咁即係現實世界有人可以入到嚟騷擾我哋啦！ K area db island：創造者康只係留低一句說話 - D代表 Die，B 代表Birth。我同莫菲斯嘅後人可以為Area DB island 提供另一個選擇。 Zip噏劇場 Game of Eden 第二季 小島篇 第74回「回憶之井」 阿攝 飾演 阿達 Cfun 飾演 盧綠 Kity 飾演 黑烏鴉 Kelvin 飾演 半黑半白烏鴉 Alton 飾演 人工智能K Area DB Island 阿蕊 飾演 年老嘅盧如 編劇及製作 阿攝 音樂 BEAT FRIDAY（Adjust, List, Nothing, Stack, Surface） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

Game of Eden 封閉區域 Area DB Island 盧零家族史 Game of Eden 封閉區域 Area DB Island 由創造者康設計，基因工程由容博士負責，程式員今敏及人工智能K Area DB Island 管理呢個封閉區域。 2061年4月1日，即NC39年4月1日，盧零貢獻身體比 π 先生之後，得到呢一個封閉區域作為禮物。經過多個月嘅時間，同今敏係設定上面得到共識。2062年1月1日，即NC 40月1月1日，盧如Fish 完成 π 先生任務之後，正式進入封閉區域Area DB Island同盧零生活。 盧零提供嘅靈魂名單內嘅人士都喺呢一個月內相繼於封閉區域內出現，並以今敏及盧零創作嘅神話設定同虛構記憶，一一輸入佢哋腦內，一行50人開始呢度生活。 以下係呢個區域嘅編年史，以盧零家庭為主： 40年 盧零成為第一任村長，與太太盧如，與其他靈魂開展新生活 50年 盧零與盧如嘅女出世，名為盧天 55年 盧零與盧如嘅細仔出世，名為盧地 70年 盧零離世，由盧如暫代村長 81年 盧如過身，盧天成為第二任村長。而盧如則轉生成獨角獸 85年 盧天兒子出生，取名為人 100年 盧天離世，被任命為渡靈者黑烏鴉。村長之位由細佬盧地擔任，成為第三任村長 120年 盧地離世，被任命為渡靈者白烏鴉。第四任村長由盧人擔任 130年 盧和世生 150年 盧人離世，被任命為渡靈者半黑半白烏鴉。兒子盧和成為第五任村長 160年盧綠出世 162年 盧葦出生 164年 盧婷出生 180年1月3日 裘智第三次飲靈魂之水 180年3月3日 舅父裘智失縱 180年8月31日 Game of Eden 伺服器重啟，封閉區域訊號中斷，盧婷失蹤，被誤送到Area 15，與阿達相遇 180年9月1日 盧和病重，盧綠成為村長，盧葦出發尋找失蹤嘅舅父及細妹盧婷 下星期，獨角獸、黑烏鴉盧天、半黑半白烏鴉盧人、阿達及盧綠，喺生死中途島對質，解開封閉區域Area DB Island 之謎。 編劇及製作 阿攝 音樂 BEAT FRIDAY 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：120年5月4日 地點：封閉區域Area DB Island 第三個島 K Area DB Island：盧天，做咗一段時間渡靈者，感覺如何？ 盧天（黑烏鴉）：已經好耐無聽過有人叫我呢個名… K Area DB Island：即係代表你已經完全融入渡靈者嘅工作崗位？ 盧天（黑烏鴉）：我只係喺度諗，如果我喺真實世界出生，又會點呢。 K Area DB Island：難道呢個封閉區域又唔真實咩？ 盧天（黑烏鴉）：我媽媽都講過一句類似嘅說話… K Area DB Island：要維護呢個封閉世界，你哋每個人都要各司其職。 盧天（黑烏鴉）：直到永遠？ K Area DB Island：無錯。或者直到你遇到現實世界嚟嘅人為止。 ——— 時間：180年9月21日 地點：封閉區域Area DB Island 第3個島 盧天（黑烏鴉）：（讀白）當細佬帶盧葦行火路通去地獄之後。我同阿仔就繼續留喺轉世之樹度，協助其他喺呢個封閉區域嘅靈魂轉世。之後，我聽到… *玻璃破裂聲效 半黑半白烏鴉：阿媽！ 盧天（黑烏鴉）：阿仔，你留係度，我去睇下！ *拍翼聲效 盧天（黑烏鴉）：我變身做黑烏鴉，即刻飛去聲音傳嚟嘅位置！然後，我見到有一個只有一種顏色嘅人，企喺生死分界線度，左手發出激光，仲打爆咗生死之壁！得一種顏色嘅人…即係唔係呢度嘅居民…咁唔通佢係？ *射箭聲效 盧天（黑烏鴉）：搞清楚佢身份之前，要將佢嘅危險性減到最低！所以我變返做人嘅形態，再射出三條黑羽毛向佢攻擊！ *中箭聲效 *滴血聲 *達痛苦慘叫 盧天（黑烏鴉）：來者何人！？ 達：（痛苦）你披住一件黑色羽毛披肩...唔通你就係盧綠所講嘅黑烏鴉？你同盧綠佢地一樣，有齊三隻顏色，即係你都係村民？ 盧天（黑烏鴉）：呢個問題我問你先啱！點解你只係得一隻顏色！ 達：因為我… 盧綠：黑烏鴉！佢係自己人嚟！你唔好傷害佢！ 盧天（黑烏鴉）：自己人又點會得一隻顏色同埋有能力破壞生死之壁呢？ *射箭聲效 盧綠：阿達！小心佢啲黑羽毛啊！ 達：黑烏鴉小姐！我無惡意架！你唔好再攻擊我啦！我入嚟搵盧婷同解開呢個封閉區域嘅謎團咋！ *中箭聲效 *達中箭慘叫 達：盧綠！全知狀態！ *全知狀態聲效 達：（全知狀態）盧綠快啲幫我執起啲黃紙，然後跑過嚟我度！ 盧天（黑烏鴉）：（全知狀態）你都有全知狀態！即係唔係普通人啦！ 盧綠：阿達，唔好講野！留返啲力去避佢啲羽毛啊！ 盧天（黑烏鴉）：盧綠，你作為第6任村長點可以幫外人呢？ *射箭聲效 盧綠：你停止攻擊我地就慢慢解釋你知！ 達：盧綠！快啲拎住黃紙跑過嚟啊！ 盧綠：得！ *奔跑聲效 盧天（黑烏鴉）：我唔會比其他人危害呢個封閉區域架！ *射箭聲效 盧綠：阿達，依家點做啊？ 達：你幫我撻着枝火柴！然後燒咗其中一張畫有咩生死之壁嘅黃紙！ *撻火柴聲效 *召喚聲效 盧綠：（讀白）就係我燒咗嗰張黃紙嗰一剎那，黑羽鴉嘅羽毛向我身體快速射過嚟，我嚟唔切反應閃避，只能夠靠自然反應，用手檔住要害！點知 *箭中玻璃聲效 盧綠：（讀白）嗰三枝羽毛喺我面前定格咗。我伸手一摸，原來我面前出現咗一面透明嘅牆！嗰三枝羽毛就插住喺牆身度！ 盧天（黑烏鴉）：可以用到呢啲妖術！你係咪π 先生派嚟破壞我哋生活嘅人！ 達：哦！你誤會曬啦！ *拍翼聲效 *變身聲效 達：盧綠！點解又會有多一隻可以變成人形嘅烏鴉嘅？仲要前後夾攻我地！ 半黑半白烏鴉：阿媽，我嚟幫你！ *射箭聲效 達：盧綠！燒曬畫有牆嘅黃紙！ *撻火柴聲效 *召喚聲效 盧綠：（讀白）因為我同阿達比兩隻烏鴉前後夾擊，所以我向唔同方向燒黃紙，希望可以全方位用透明玻璃牆擋住佢哋嘅羽毛攻擊！ *箭中玻璃牆聲效 半黑半白烏鴉：睇下你地擋唔擋到由天射落嚟嘅羽毛箭雨！ *半黑半白烏鴉大叫！ *箭雨聲 *箭中玻璃聲效 達：嘩！好彩黃紙夠多！同埋盧綠你夠醒！我哋先可以匿喺用透明玻璃牆砌成嘅保護罩入面！ 盧綠：但你隻右手流好多血！ 達：無傷到隻左手就得啦… *敲玻璃聲音 半黑半白烏鴉：（玻璃外）喂！你兩個出嚟！盧綠！你身為村長竟然幫來歷不明嘅外人！ 達：你哋誤會啦！我唔係π先生嘅人啊！ 盧綠：π先生…即係同盧零有關係嘅π先生？ 半黑半白烏鴉：（玻璃外）阿媽，依家點算啊，我哋啲羽毛箭似乎破壞唔到呢度透明嘅保護罩… 達：係囉，依家你攻擊唔到我哋，可以慢慢聽我解釋啦？ 盧天（黑烏鴉）：（玻璃外）阿仔，唔駛心急。我哋攻擊唔到，佢哋都出唔到嚟。加上呢個人流緊血。佢啲血越少，講嘅說話就越真。 盧綠：兩位！呢個叫阿達，係現實世界嘅人。佢入嚟係協助搵喺大凶日失蹤嘅婷婷！呢段時間我有不斷觀察佢，佢係真心幫我地！唔係壞人嚟！ 盧天（黑烏鴉）：（玻璃外）盧綠！你都有睇過人工智能比你有關呢個封閉區域嘅記憶！你都知真實世界嘅人有幾複雜啦！ 達：點解你哋呢度每個人都想殺我！盧綠係咁，裘雪又係咁，你地都係咁！ 半黑半白烏鴉：（玻璃外）呢個世界得來不易。平安是寶藏，我哋不惜一切代價去保護大家嘅安全。 達：即係我講咩都無用啦！ 盧天（黑烏鴉）：（玻璃外）我只係知道頻死嘅人會講真話。而我可以等。 盧綠：阿達，你傷口太深！同埋呢個透明保護罩好密！氧氣越嚟越少… 達：盧綠…幫我撻火柴…然後幫我燒咗呢個紙紮人仔… 盧綠：阿達…你想點？ 達：呢個係最後嘅方法… *撻火柴聲效 達：我會搵方法再入嚟！ *獨角獸聲效 *拍翼聲 盧綠：（讀白）呢個時候，獨角獸從天而降！停係我哋同兩位烏鴉中間。 盧天（黑烏鴉）： （玻璃外）阿媽？ Zip噏劇場 Game of Eden 第二季 小島篇 第73回「盧天」 阿攝 飾演 阿達 Cfun 飾演 盧綠 Kity 飾演 黑烏鴉 Kelvin 飾演 半黑半白烏鴉 Alton 飾演 人工智能K Area DB Island Harry 飾演 裘雪 編劇及製作 阿攝 音樂 BEAT FRIDAY（Almond, Stack, List, Sad City, thing, Diner） 封面設計 Followmelikeblack 時間：同一時間 地點：封閉區域Area DB Island 啞鈴洲凱安家中 裘雪：（讀白）盧綠同玄武童子出發到依家已經有六日。觀星閣同北帝廟嘅修復工程都進行之中。而我除咗監督修復工作之外，亦盡量默寫返原本喺觀星閣嘅資料。另外，由於玄武童子嘅出現，令北帝廟某啲資料受損，例如歷代村長嘅頭像。第一任村長係盧零，妻子係盧如。當盧零過世之後，盧如成為處理村長，然後就由佢地嘅女盧天做第二任村長，盧天離任之後，就由盧零同盧如嘅細仔 - 盧地做第三任村長。第四任村長就係盧天嘅仔 - 盧人。而第五任村長就係早前過身，即係盧綠嘅爸爸盧和。畫咗佢哋咁多位嘅畫像之後，就會掛返喺北帝廟入面。 跟住…凱安又發出痛苦嘅呻吟聲…自從佢喺村長選舉飲咗靈魂之水之後…就久病不起…最近皮膚仲出現奇怪嘅變化…佢手臂嘅皮膚好似發生異變咁出現硬化…外型類似魚嘅鱗片…之前咁多年嚟都無村民出現呢個情況…我除咗每日監察佢嘅情況…同幫佢抹身之外…可以點做呢…？ Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island 第3個島 *拍翼聲效 *獨角獸叫聲 達：（讀白）雖然唔駛坐船，唔怕暈船浪...不過喺咁高空，無安全帶嘅情況之下騎住獨角獸飛...都唔係特別爽...飛咗接近24小時，橫越咗唔知幾多公里之後...我終於遠望到第三個島啦！ 佢嘅外形，真係同希臘字母​ ε嘅外形係一樣！即係代表搵啱地方啦！ 獨角獸！加速！ *拍翼聲效 *獨角獸叫聲 達：（讀白）唔駛幾耐，獨角獸就降落係第三個島！ *馬踩沙地聲效 達：（讀白）我跳離咗獨角獸，跑去沙灘嘅一個位置，然後發現一隻木筏！唔通盧綠無事！仲嚟咗第三個島！？ *全知狀態聲效 達：（讀白）我即刻打開全知狀態！不過可惜…我完全感覺唔到佢嘅氣息… *獨角獸叫聲 達：（讀白）突然間，獨角獸大叫，快速跑離沙灘，然後拍翼飛走咗！ *馬跑及拍翼聲效 達：喂！你去邊啊！喂！ 唔駛幾秒…佢就飛出咗我嘅視線…唔知飛咗去邊度…留低我一個人喺沙灘… *步行聲效 我行上沙灘一望，呢個島非常之大，不過面前只得一片黃土，對比起百草園、千獸島，呢度一片荒蕪…究竟第三個島有咩用途呢？ *白鴿拍翼聲效 又有白鴿飛過！之前就係透過佢搵到提示！所以我跟住佢一路行！ 行咗好耐，終於見到一棵樹，呢棵就係橄欖樹！白鴿飛到橄欖樹上面停低咗。 白鴿同橄欖樹…令我諗起聖經嘅《創世紀》。當大洪水消退之後，挪亞放出白鴿，希望透過佢搵到陸地。過咗一段時間，白鴿擔住一塊橄欖葉返到方舟，令挪亞知道有乾嘅陸地，亦為大家帶嚟希望。估唔到，呢個封閉區域除咗有玄武大帝嘅神話，亦有聖經故事… 我行近棵橄欖樹，發現樹上面有4粒果實。一粒已經熟到就嚟爛，另外兩粒就啱啱成熟，最後一粒就好青，似係啱啱結果。 而白鴿不斷望住西方嘅方向。我用全知狀態望住白鴿，佢只係得墨綠色遊戲碼同灰色嘅人工智能碼，代表佢無靈魂，只係一個程式。咁佢除咗暗示第三個島嘅存在，仲有咩功能呢？ *步行沙地聲效 我沿住西方一路行，一路用全知狀態感知周圍嘅情況。行咗好耐，去到一個好濃霧嘅地方，啲霧比霧島更大… 然後… *跌倒聲效 哎喲！ 我踩到啲咩呢？ 係…一個人！ 唔通係盧綠！ 但我仔細一望，呢個後生仔雖然同盧綠有啲相似，但就比佢年輕少少，全身冰冷，無生命同靈魂嘅跡像…呢個…應該就係盧綠嘅細佬…盧葦… 我思考咗一陣…決定… *激光聲效 我要令呢個屍體消失！ 屍體比我左手嘅激光打成灰燼，我拎出一張黃紙，唔駛幾秒，灰燼就被黃紙吸受。 *吸受聲效 黃紙上，就係死者嘅外貌，背面寫住 - 162 - 180年盧葦的屍體… 果然…係佢… 我袋起張黃紙，再向西面方向出發…行咗一段時間… *撞玻璃聲效 哎喲！ 又撞到啲咩呢？ *摸玻璃聲效 原來係一度透明嘅玻璃牆…呢個感覺，同喺張保仔洞開啟完機關送咗盧婷入去之後，我撞到嗰一度透明牆好似…但呢度方圓咁多里…咁度透明嘅玻璃牆咪好似萬里長城咁長？ 我摸住玻璃牆一直行，牆嘅另一面都係非常大霧，睇唔到牆嘅另一邊嘅景像。不過好彩，唔駛幾耐…我終於都見到一個我好想見到嘅人！ 佢就係盧綠！ *急跑聲效 達：盧綠！你無事就好啦！我以為你死咗啊！ 喂！盧綠！你出句聲啦！你跌咗落山涯，點解會無事？仲嚟到第三個島嘅？同埋你做咩咁傷心？仲跪咗係度嘅？ 喂！盧綠！你應下我啊盧綠！ 盧綠：（傷心欲絕）阿葦佢死咗...因為我做得唔好...所以佢先會死... 達：（讀白）佢一提盧葦，我就摸一摸褲袋入面吸咗佢屍體嘅黃紙…我猶豫咗幾秒…最後決定唔同佢講呢件事…因為我唔知點解釋我有呢種能力… 所以，我唯有安慰佢，同佢講：雖然我唔知你喺呢度發生咗咩事…但我都經歷過失去親人嘅痛...我知你好傷心…但你仲有婷婷，我哋依家都嚟到第三個島，好快就可以解開所有謎團架啦！ 盧綠：我想帶阿葦條屍返啞鈴洲先...搵婷婷嘅事...靠你啦... 達：但係… 盧綠：阿達…我真係好攰…自從大凶日之後…實在發生太多超出我想像嘅事…我… 達：我明白嘅… 盧綠：（疲累，空洞）阿葦佢穿過咗呢度透明嘅牆…有一位黑烏鴉小姐同我講…呢度牆係生死嘅分界線… 達：黑烏鴉？生死嘅分界線？ 盧綠：（疲累，空洞）詳情我都唔清楚…或者你等嗰位黑烏鴉小姐返嚟…你再問佢呢度嘅秘密啦… 達：（讀白）我再摸住呢度透明嘅玻璃牆…雖然我唔知盧綠口中生死分界線係咩意思…但係我係度諗…如果當時盧婷被九頭海蛇捉走嘅時候，我已經識得運用左手嘅能力，可以打破擋住我同盧婷嘅透明玻璃牆…我係咪就可以即刻救到佢呢？ 跟住，我左手掌心慢慢發出激光，腦入面不斷諗起盧婷被捉走嘅畫面，越回憶…就越內疚…越內疚…左手掌心就越光！ 直到！ *激光聲效 激光由我左手掌心直射落我掂住玻璃嘅位置，再由接觸位作為圓心擴散！不過今次有啲唔同，因為平時我知道我想消失嘅物件嘅體積，我射死過最大嘅就係獨角獸，整個過程不唔一分鐘就完成…但係今次…我對呢塊玻璃牆嘅長度同高度完全無概念！我只係見到透明嘅牆慢慢出現裂痕！ *玻璃破裂聲效 我枱頭四周圍望，玻璃牆嘅條裂痕由我掌心掂住嘅位向多個方向延伸！而其中一條向上嘅裂痕一直升升升，好似想升到上天咁！頭先盧綠話呢度牆係生死分界線，咁咪即係直上天際，橫越成個島？咁我啲激光要射幾多同幾耐呢？ 而其實每次發射激光都會消耗體力…之前喺千獸島出過幾次，終於打贏獨角獸，就攰咗我成晚，瞓咗成十幾個鐘先醒！今次咁射法，咪好似摩西分紅海咁誇張？ 一諗到呢度，見住激光源源不絕喺我左手射出嚟就覺攰！所以我即刻煞停想消滅呢度唔知幾大幾長嘅玻璃牆嘅想法，用力將左手掹出嚟！ 而就係我掹出左手嘅瞬間！應該有5米高5米闊嘅玻璃牆爆裂成灰！ *玻璃爆裂聲效 盧綠：（疑惑）阿達…點解你…可以發出激光？仲可以打破呢度生死之牆嘅…？ 達：（少少喘氣）我無應盧綠，而係即刻拎一張黃紙出嚟，等黃紙吸受玻璃牆嘅粉末！ *吸受聲效 不過原來黃紙都有吸受嘅極限，佢完成吸受嘅程序，跌咗係地面，但仲有好多粉末係半空，所以我同一時間扔出幾張黃紙，希望可以吸受曬被我射爆嘅牆。然後我就行去執起地面嗰張黃紙。紙上畫咗牆嘅圖案，背後寫住「生死之壁」四個字，無寫年份。 盧綠：（疑惑）阿達…你呢個能力…即係當時係你消滅食人花嘅？ *飛箭聲效 達：（讀白）當我準備回答盧綠問題嘅時候，我感知到有一啲野快速向我飛埋嚟！可惜，我嘅反應同身體唔夠嗰啲不明物體快！當我避開嗰一煞那，我已經中咗招！ *箭插入肉聲效 啊！我右手嘅膊頭、手臀同手掌分別被三支黑色嘅羽毛插中！ *滴血聲效 然後，我感知到有人行緊埋嚟！ 黑烏鴉：來者何人！？ 達：你披住一件黑色羽毛披肩就係盧綠所講嘅黑烏鴉？你同盧綠佢地一樣，有齊三隻顏色，即係你都係村民？ 黑烏鴉：呢個問題我問你先啱！點解你只係得一隻顏色！ Zip噏劇場 Game of Eden 第二季 小島篇 第72回「破壁」 阿攝 飾演 阿達 Cfun 飾演 盧綠 Kity 飾演 黑烏鴉 編劇及製作 阿攝 音樂 BEAT FRIDAY（Adjust, Camel, Surface, Night, List, Recharge） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island 第3個島 盧綠：（讀白）一直以嚟搵嘅第3個島...原來係生死嘅中途島...但呢一刻嘅我...好無助...因為我見住黑烏鴉帶走咗阿葦嘅靈魂...去到棵光禿禿嘅大樹同七隻母雞前面做轉世嘅程序...但就算我飲咗靈魂之水，感官提升好多都好，佢地嘅聲音都比透明嘅牆完全阻隔住... 我淨係見到阿葦餵樹葉比啲母雞食，然後扭一扭佢地啲腳就會生蛋...但生嘅係咩蛋...啲蛋有咩用...我完全唔知道...我呢個阿哥真係好無用啊... — 黑烏鴉：而你仲有5塊樹葉，諗住點樣用？ 盧葦：我想用晒呢5塊樹葉，指定下一世重遇嘅人！ *母雞叫聲 *食葉聲效 黑烏鴉：你想重遇邊一個？ 盧葦：我想重遇返舅父！ *扭腳聲效 盧葦：點解無雞蛋生出嚟嘅！？ 黑烏鴉：因為你根本無可能重遇返佢... 盧葦：即係佢呢一世都會留喺地獄！？ 黑烏鴉：唔係一世，係永遠。呢個就係犯禁嘅最終懲罰。 盧葦：但永遠即係幾耐啊！？ 黑烏鴉：永遠...就即係永遠...直到呢個世界消失為止... 盧葦：舅父只係想知道呢個世界嘅事同想見玄武大帝啫，都罪不至咁啊！ 黑烏鴉：你同我講都無用架，因為訂立規矩嘅唔係我...我只係執行者。 盧葦：佢永遠都留喺地獄，咁同消失有咩分別啊！？ 黑烏鴉：盧葦，我同你講過你要上嘅係自己嘅路，其他人嘅命運呢一刻與你無關。 盧葦：阿爸有份令舅父飲靈魂之水，咁阿爸係咪都要落地獄？ 黑烏鴉：盧葦...你舅父用自己嘅下場話比大家知道犯禁嘅後果。你轉個角度去諗，其實佢嘅犧牲係有價值嘅。 盧葦：要用一個罪與罰嘅方法，去令大家「聽話」咁生活落去，唔覺得好殘忍咩！仲有，如果嗰個人工智能有再洗走舅父嘅記憶，舅父就唔會出事！所以根本就係玄武大帝嘅圈套！令舅父永遠都要喺地獄受苦！ 黑烏鴉：但以你舅父嘅性格，佢一定會瘋狂試藥，又會用盡方法嚟第三個島，最終下場都係一樣。 盧葦：但佢嘅性格、行為同求知慾係呢個世界影響而成！ 黑烏鴉：咁你係咪想話係呢個世界嘅錯？創造人類嘅時候係咪要收起佢地求知嘅慾望？ 盧葦：呢啲問題太複雜啦！我只想講舅父唔應該永遠被困喺地獄！ 黑烏鴉：咁你想點？ 盧葦：我想代舅父受苦，等佢可以輪迴轉世。 黑烏鴉：咁就到你永遠喺地獄受苦。你所儲嘅陰德值無晒，無得投胎成為你阿哥嘅仔，無得同佢地重遇，無得完成你今世未完成嘅事。 盧葦：係！我願意！ 黑烏鴉：你真係諗清楚？落咗去，無得返轉頭。 盧葦：我諗得好清楚！ 黑烏鴉：希望你唔好後悔啦。跟我嚟。 *步行聲效 盧葦：（讀白）我跟住黑烏鴉一直向前行，唔駛幾耐就去到島嘅盡頭。盡頭有三條橋，左邊一條橋係白色向上直達天際；中間一條就由彩虹七色所組成，一直向前無限伸延，睇唔到盡頭；最右邊嗰條就著咗火咁，向下方建造...守住呢三橋嘅分別係白色同半黑半白嘅烏鴉。佢地見到黑烏鴉小姐帶咗我嚟，即刻全身發光，一齊變成男人嘅樣貌！ *變身聲效 盧葦：（讀白）白色烏鴉比半黑半白烏鴉年紀大少少，佢同黑烏鴉小姐講 白烏鴉：家姐，呢個盧葦係咪大蠢？你好似要同佢解釋好耐咁嘅？ 黑烏鴉：唔係，佢只係有太多執著啫。 半黑半白烏鴉：盧葦，咁你快啲將你嘅雞蛋比我，等我即刻煮蛋花湯比你飲，飲完就行呢條彩虹橋上路啦。 黑烏鴉：阿仔，佢唔想轉世，而係想落地獄搵裘智。 半黑半白烏鴉：吓！我真係越嚟越唔明你地呢代人嘅想法囉！ 盧葦：等等先...白烏鴉先生叫黑烏鴉小姐做家姐，而黑烏鴉小姐就叫半黑半白烏鴉先生做阿囝...但明明你地望落都差唔多年紀...點會係一家人呢？ 黑烏鴉：當你地咗地獄，就有好多時間去思考呢個問題。 *脫羽毛聲效 黑烏鴉：盧葦，你本來係要轉世做人，理應只可以行中間嘅彩虹橋。不過你決意要落地獄同你舅父相見，我就以渡靈者嘅能力成全你。呢條係我身上嘅羽手，亦係入地獄嘅通行證。只要你拎住佢，就可以行火路，通去地獄。 盧葦：就係咁簡單...？ 白烏鴉：一啲都唔簡單，因為若果你未行完火路就鬆開手，跌咗條羽毛，你就會被火燒到灰飛煙滅，永遠消失。 黑烏鴉：你準備好未？ 盧葦：準備好啦... 黑烏鴉：細佬，你較為有經驗，你帶佢上路啦。 白烏鴉：盧葦，咁我地行啦。 盧葦：（讀白）我拎住黑烏鴉小姐比我嘅黑色羽毛，擰轉頭望向阿哥嘅方向。我依家身處嘅位置太遠...遠到已經見佢唔到...無幾耐之前，我應該會轉世成為阿哥嘅仔...不過依家...我決定去搵舅父，代舅父受罪。阿哥，對唔住...希望有機會可以再同你做親人啦... 白烏鴉：盧氏第六代子孫盧葦放棄輪迴轉世，手執渡靈者之黑羽毛，打開地獄之橋，自願前往地獄。 *踩火路聲效 盧葦：嘩！真係好熱！好痛同好辛苦！ 白烏鴉：呢個只係通往地獄之路嘅開始。希望你捱得住啦。 Zip噏劇場 Game of Eden 第二季 小島篇 第71回「三色橋」 Cfun 飾演 盧綠 鄧添樂 飾演 盧葦 Kity 飾演 黑烏鴉 小白 飾演 白烏鴉 Calvin 飾演 半黑半白烏鴉 阿攝 飾演 阿達 編劇及製作 阿攝 音樂 BEAT FRIDAY（Almond, Surface, Two, Stack, Fall） 封面設計 Followmelikeblack 達：（讀白）雖然唔駛坐船，唔怕暈船浪...不過喺咁高空，無安全帶嘅情況之下騎住獨角獸飛...都唔係特別爽...飛咗接近24小時，橫越咗唔知幾多公里之後...我終於遠望到第三個島啦！ 佢嘅外形，真係同希臘字母​ ε嘅外形係一樣！即係代表搵啱地方啦！ 獨角獸！加速！ Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island 第3個島 盧綠：我終於嚟到第3個島，終於搵到舅父嘅線索同日記…但我太遲啦...阻止唔到阿葦飲新嘅靈魂之水...佢更加中毒...離開咗... 之後我都飲咗呢款靈魂之水，更見到舅父所指嘅怪異奇景 - 一隻黑烏鴉喺我面前變成一位小姐，仲帶走咗阿葦嘅靈魂...行到嗰棵光禿大樹前面...但我被一度透明嘅牆檔住，只能夠遠望佢地... – 盧葦：（讀白）黑烏鴉小姐叫我伸手掂住棵樹，就喺掂住嘅嗰一刻，好似有一股氣流通過我全身再走入棵樹度，棵樹好似被呢股氣流刺激咗，光禿禿嘅樹突然生長！ *樹木生長聲效 盧葦：（讀白）佢生出咗好多塊樹葉出嚟！ 黑烏鴉：你望唔望到有一塊樹葉係黑色架？ 盧葦：望到... 黑烏鴉：嗰塊既係樹葉，亦係你作嘅孽。 盧葦：就係因為我飲咗靈魂之水...知道唔應該知道嘅事？ 黑烏鴉：原本你會直接落地獄，不過你都係被裘智所影響，所以未至於成棵樹都係黑色樹葉。 盧葦：即係舅父落咗地獄？我想去搵佢！ 黑烏鴉：呢棵樹會檢查你生前嘅善惡同陰德。如果只係得黑色葉，就會落地獄；如果全棵都係白色葉，就會上天堂；但好似你咁，得一塊黑色葉，另外有十幾塊綠色葉，代表你要去轉生。 盧葦：咁舅父即係去咗邊度！？佢邊隻色嘅葉多啲啊！另外我阿爸呢！？同埋婷婷佢仲在唔在生啊？ 黑烏鴉：盧葦，你要上嘅係自己嘅路，其他人嘅命運呢一刻與你無關。 *樹葉跌下聲效 黑烏鴉：快啲執起跌落嚟嘅綠色樹葉，進行轉世嘅下一步。 盧葦：如果我唔執呢？ 黑烏鴉：咁你就會成為百幾年嚟第一個永久消失嘅靈魂。 盧葦：咁我即係無得揀... 黑烏鴉：你可以揀點餵飼呢七隻母雞。 盧葦：用啲樹葉嚟餵？會唔會太奇怪啊？ 黑烏鴉：你都係第一次死，所以出現喺你面前嘅任何事情都係奇怪嘅。你聽埋就會明白。首先，綠色嘅樹葉就係你上世所積嘅陰德。你每餵一塊樹葉比一隻母雞，再扭佢雞腳一下，佢就會生蛋。每一隻蛋就代表你下一世嘅一件事。 盧葦：但我有13塊樹葉，每隻雞餵一塊，咁淨低啲樹葉又點啊？ 黑烏鴉：好簡單，每隻雞可以餵多過一塊樹葉。而一次過餵5塊，就可以生出指定嘅雞蛋。當然你可以將陰德儲起，留返下一世先用。你試一次就會知道。 盧葦：但呢七隻母雞外貌都好似差唔多，佢地分別又代表咩呢？ 黑烏鴉：第一隻代表下一世嘅物種；然後係性格、能力、記憶、重遇嘅人、運氣同死法。 盧葦：即係會有人轉世做動物或者植物？咁咪代表百草園同千獸島嘅生物，上世可能係人？ 黑烏鴉：所以，若果飲咗靈魂之水，就可以睇到邊啲有靈魂，邊啲只係程式。 盧葦：點解我地世世代代，就連村長都唔知呢個轉世程序？玄武大帝相傳嘅故事都無相關嘅內容，淨係話人死咗之後就會回歸佢嘅懷抱咋喎！ 黑烏鴉：如果一切都有指定答案，人生或者會無咁多樂趣？呢個係我喺度咁多年思考到嘅結論。 盧葦：其實你究竟係邊個？你係咪同玄武大帝一樣...都係咩人工...智能？ 黑烏鴉：如果係，或者我嘅工作會更快樂。好啦，唔想成為久消失嘅靈魂，就快啲扭雞蛋，進行轉世程序。 盧葦：等等先！若果我下一世唔係做人，之後扭到嘅命運、性格、記憶等等嘅野咪無用？ 黑烏鴉：你好幸運，下世都可以轉世做人。所以第一隻雞生出嘅蛋就代表你下一世嘅父母。 盧葦：原來...上一世嘅我選擇咗做阿爸阿媽嘅仔... 黑烏鴉：咁又未必。或者你上一世無咁多樹葉，根本無得揀。又或者你無用喺呢度，全部用咗去其他母雞度，去決定你呢一世嘅事呢。 盧葦：所以，我今世所遇到嘅人同事，我以為嘅緣份...可能唔係巧合？而係上一世嘅我去決定？我諗上一世嘅我應該無諗過我咁就死咗...又要玩呢個轉生遊戲... 黑烏鴉：有靈魂累積咗好多陰德，有好多塊樹葉。所以佢可以指定下世好多件事。有靈魂好灑脫，覺得今世事今世了，下一世由零開始。呢個就係既定框架下嘅自由意志。 盧葦：如果係裘雪，佢一定想承繼呢一世嘅知識...下一世繼續鑽研天文同科學...比著係凱安，佢就一定想下世都有高強嘅武藝...一世接一世...直到可以搵到甚至打贏九頭海蛇為止... 黑烏鴉：或者直到你上天堂、落地獄，又或者等你放下執著，選擇從頭嚟過。呢個就係轉生作業系統嘅運作。 盧葦：（讀白）13塊樹葉，去決定下一世嘅父母、性格、能力、記憶、重遇嘅人、運氣同死法...我應該點樣揀好呢... – 盧葦：（讀白）我望住遠處企係透明外牆嘅阿哥，佢一直企係度好憂愁咁望住我地... 黑烏鴉：點啊盧葦？你諗清楚未？ 盧葦：嗯...我諗我諗清楚啦... 黑烏鴉：咁第一隻關於父母嘅選擇，你會點揀？ 盧葦：我想用5塊樹葉，扭指定嘅雞蛋。 *母雞叫聲 *食葉聲效 黑烏鴉：咁你下一世想成為邊個嘅仔女？ 盧葦：我想成為我阿哥，盧綠嘅仔。 黑烏鴉：但佢可能有排都未結婚生仔架喎。 盧葦：我可以等架！我今世太任性，亦欠佢太多，所以想下一世做佢嘅仔，好好回報佢，同時又唔需要浪費一個重遇佢嘅機會。 黑烏鴉：都係一個聰明嘅選擇。咁你可以扭第一隻母雞嘅腳。 *扭腳聲效 *跌蛋聲效 盧葦：隻雞蛋上面寫住「成為盧綠的兒子」。之後嘅雞蛋要用嚟做咩？ 黑烏鴉：你見唔見到前面半黑半白烏鴉嘅位置。佢會幫你用啲蛋煮一碗蛋花湯。飲完就會清洗呢一世記憶，只會保留雞蛋嘅選項，過埋條橋就可以轉世。 盧葦：係我面前就係撐管性格嘅母雞。我先餵佢食一塊樹葉，再扭佢嘅腳掌 *母雞叫聲 *食葉聲效 *扭腳聲效 *跌蛋聲效 盧葦：性格嘅雞蛋寫住「時而冷靜，時而火爆暴燥...為求目的可以不擇手段」。而能力嘅雞蛋就扭到「極強感染力及領導能力」。嘩...同我呢一世好大分別...到時成為阿哥嘅仔...肯定激死佢... 黑烏鴉：你可以選擇唔要嘅。咁下一世呢兩件事就會隨機安排喺你身上。 盧葦：咁又唔駛...我相信阿哥可以教好我嘅！ 黑烏鴉：咁記憶呢？想隨機保留一小段記憶？定係指定一段珍貴嘅記憶？好多靈魂都喺呢個位用咗好多時間。 盧葦：可唔可以保留見到你或者飲靈魂之水嘅記憶？ 黑烏鴉：見到我係你死後嘅事，唔符合「生前」記憶嘅資格。至於靈魂之水嘅事...你都體會佢嘅苦同後果，下世仲想試？ 盧葦：明白。 *母雞叫聲 *食葉聲效 *扭腳聲效 *跌蛋聲效 盧葦：我隨機扭到嘅記憶係我細個嘅時候，舅父帶我同阿哥、婷婷一齊出海嘅經歷，仲教我地各種動植物嘅知識。嗰陣時真係開心。但下一世我都未必會見到佢地，咁有咩用啊？ 黑烏鴉：咁會令你對海有歸屬感，又會令你好喜歡同人去大海玩，下一世你就會知架啦。 盧葦：仲有三隻母雞，分別係下一世重遇嘅人、運氣同死法... 黑烏鴉：而你仲有5塊樹葉，諗住點樣用？ 盧葦：我想用晒呢5塊樹葉，指定下一世重遇嘅人！ *母雞叫聲 *食葉聲效 黑烏鴉：你想重遇邊一個？ 盧葦：我想重遇返舅父！ Zip噏劇場 Game of Eden 第二季 小島篇 第70回「轉世作業系統」 Cfun 飾演 盧綠 鄧添樂 飾演 盧葦 Kity 飾演 黑烏鴉 編劇及製作 阿攝 音樂 BEAT FRIDAY（Almond, Recharge, Stack, Roast, Night, With You） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

地點：封閉區域Area DB Island 第3個島 時間：180年9月21日，盧綠搵到盧葦前 *飲水聲效 *心跳加速聲效 盧葦：（讀白）心跳越嚟越快…吻合舅父所講飲完靈魂之水嘅狀況…然後… *全知狀態聲效 盧葦：（讀白）我終於睇到舅父所講嘅世界！我感受到霧氣嘅流動…就連離我好遠嘅海浪聲我都聽得到…我所有感官嘅感知力都大大提高…咁我係咪可以感應到婷婷依家係邊？ *腳步聲 *掘泥聲效 盧葦：（讀白）我感應到有人係度掘緊泥…仲打開咗一本書？係咪婷婷啊？你係咪係度！係咪搵到舅父嘅日記？ *心跳加速聲效 盧葦：（讀白）但我嗰心！越跳越快！快到好似…就嚟要跳出嚟咁…唔通呢個就係副作用…仲有…我眼前嘅景像…越嚟越黑…越嚟越無力… *跌落地聲效 盧葦：（讀白，辛苦）係再見到婷婷之前…我唔可以…有事架… *耳嗚聲 裘智：葦仔！你唔好瞓啊！ 盧葦：舅父…我係咪…發夢啊… 裘智：綠仔好快會嚟救你！你唔好瞓啊！ 盧葦：阿哥…？ 裘智：撐住啊！葦仔！ *腳步聲效由遠至近 盧綠：（遠距離，細聲）葦仔！你係咪係度啊！葦仔！ *跌倒聲效 盧綠：我踢到啲咩呢？ 盧葦：（虛弱）阿...哥...我... 盧綠：阿葦！我終於都搵到你啦！！！ 盧葦：（虛弱）阿...哥...靈...魂...之...水...我...見...到... 盧綠：葦仔！你唔好講野住！我搵方法帶你返去！ 盧葦：（虛弱）太...太...遲啦...對 盧綠：你唔好再講野！阿哥即刻帶你走！ 盧葦：（虛弱）對... 盧綠：阿葦！你唔好瞓啊！阿葦！！！ 盧葦：（虛弱）唔...住... 盧綠：阿葦！！！ *太力打身體聲效 盧綠：阿葦！你醒啊！ *太力打身體聲效 盧綠：阿葦！！！ *悲傷音樂 盧綠：阿葦...斷咗氣...佢袋入面...有卡比木、九節木維迪斯葉、惡夢磨菇短尾草幾種藥材...同一樽調配好嘅靈魂之水...點解...舅父又係咁，阿葦你又係咁，為咗見所謂嘅玄武大帝，同知所謂嘅真相，都要做到咁嘅地步！無咗條命都要去試！！！ （向天大叫）人工智能！你同我出嚟！由阿達入咗嚟到依家！你仲要龜縮到幾時啊！！！ 我地世世代代都跟足你嘅指示去做！你仲要玩我地到幾時啊！！！ 出嚟啊！你同我出嚟啊！！！ *打開袋聲效 *開水袋聲效 呢個就係舅父同阿葦所飲咁新靈魂之水...佢地都係飲完就出事...咁我飲完...又會發生咩事呢... *飲水聲效 *全知狀態聲效 我再次開啟全知狀態，阿葦已經無咗屬於佢嘅靈魂顏色...人工智能都無出現...我集中所有精神，嘗試感知呢個島嘅所有氣息同發生嘅事...感知範圍由10米，到50米，再遠到去100米...然後我聽到... *獅子、犀牛、熊人腳步聲效 呢個島竟然有千獸島先會出現嘅動物！我跟住腳步聲傳嚟嘅方向，即係西面跑過去！ *跑步聲效 我喺濃霧之中不斷跑！好快就見到一隻獅子、犀牛同熊人並排行。而嗰隻熊人散發出嚟嘅感覺，咁似我喺千獸島對戰嗰隻嘅！？ *鷹拍翼及叫聲 我聽到身後面有一隻獵鷹拍翼，我擰轉身一睇，佢向我飛過嚟，仲穿過我嘅身體！ 點解會咁嘅！？係我嘅幻覺...定係...佢地唔係動物...而係出咗竅嘅靈魂？ 因為太奇怪啦，所以我唔敢跟得太貼...我慢慢跟住佢地行...而啲霧就慢慢消散...終於佢地停低，喺佢地面前出現咗一隻黑色嘅烏鴉，係唔係舅父見到嗰隻呢！？ *烏鴉叫聲 佢伸出其中一對翼，指示嗰幾隻動物向前行 然後，隻烏鴉望到我，仲向我飛過嚟 *拍翼聲效 更用佢嘅嘴啄咗我隻手一下！度力大到流血添！ *滴血聲效 隻烏鴉飲我滴喺地上面嘅血！成個畫面好詭異！ 不過，更詭異嘅係...隻烏鴉飲完我啲血，就喺我面前全身發光...仲變成同我一樣咁高嘅人！佢係一個20-30歲嘅女人，一頭烏黑長髮，身穿黑袍，帶住長長到地，由黑色羽毛製成嘅披肩。佢凝重咁望住我，同我講 黑烏鴉：盧綠，你唔應該喺呢度出現，請回啦。 盧綠：你究竟係邊一個？點解會識得我？ 黑烏鴉：我認識啞鈴洲所有嘅人，佢地需要你呢位村長。你按住嚟嘅方向離開就可以啦。 盧綠：你同我一樣身上都有3隻色，你唔係人工智能，你係邊個？ 黑烏鴉：我係邊個唔重要，重要嘅係你嘅崗位。大家各司其職，啞鈴洲就可以平安咁運作落去。 盧綠：我呢刻嘅崗位就係一位哥哥，我唔帶阿葦同婷婷返去，係唔會走！ 黑烏鴉：放心，玄武大帝自有安排。 盧綠：唔好再講咩玄武大帝！我唔會再信呢一套！ 黑烏鴉：無論你信唔信都好，都改變唔到呢個世界嘅規則。 盧綠：但盧零無問過我地想唔想要呢啲規則呢！ 黑烏鴉：咁點做先可以令你返去啞鈴洲？ 盧綠：好簡單，我要帶葦仔同婷婷返去！ 黑烏鴉：估唔到盧和嘅仔咁硬頸咁固執。不過對比盧葦，你係較適合做村長嘅。 盧綠：你唔好咁多廢話！你再阻住我，就唔好怪我唔客氣啦！ 黑烏鴉：盧婷方面，我就無能為力。不過，我可以比你再見盧葦一面。跟我過嚟。 盧綠：（讀白）我跟住呢位來歷不明嘅黑烏鴉小姐向前行，無幾耐，我就見到舅父靈魂出竅嚟到第3個島嘅畫面！就係一棵光禿禿嘅大樹，旁邊有7隻母雞。樹前面有兩隻烏鴉，一隻白色，一隻半黑半白，而阿葦同剛才見到嘅動物就企咗喺樹前面！ 跟住嗰兩隻烏鴉身上又發出閃光，變成兩個分別身穿白羽毛同黑白羽毛披肩嘅男人。 白烏鴉男人伸手示意阿葦掂嗰棵光禿禿嘅大樹。 （大叫）阿葦！我嚟咗啦！阿葦！ 盧葦：（大叫，玻璃內）阿哥！！！ *奔跑聲效 盧綠：阿葦！ *撞玻璃聲效 盧綠：點解好似有一塊透明嘅牆擋住我地嘅！？黑烏鴉，你快啲答我！ 黑烏鴉：盧綠，你望到佢身上嘅顏色，應該知點解架。 盧葦：（玻璃內）阿哥...對唔住...我無聽你講...私自出海...仲飲咗舅父調配嘅靈魂之水... 盧綠：阿葦，你咩都唔駛講！阿哥一定有方法帶你返啞鈴洲架！ 盧葦：（玻璃內）阿哥...無用架...我諗我同舅父一樣，飲嘅份量太多...所以中毒身亡咗... 盧綠：黑烏鴉！我用第6代村長嘅身份命令你！快啲放咗阿葦！ 黑烏鴉：盧綠，就算你係村長，但都無能力打破生老病死嘅規條。盧葦同裘智一樣，擅自飲靈魂之水，成為村長以外得知世界真相嘅人，所以下場只有一個，就係死。而擋住喺你兩兄弟中間嘅，就係生死嘅分界線。 盧葦：（玻璃內）阿哥，原來所謂嘅第3個島，係生死嘅中途島...原來有啲野...真係要死咗先知... 黑烏鴉：原本裘智同盧葦嘅陽壽會更長，可惜佢地挑戰規條。我地都阻止唔到。 盧綠：如果呢個世界無靈魂之水，無惡夢磨菇，舅父同阿葦咪乜事都無囉！ 盧葦：（玻璃內）阿哥...就算呢啲藥材全部都唔存在，但我同舅父都一樣會去不斷試... 盧綠：試到你地兩個都死咗啦… 黑烏鴉：呢百幾年嚟，裘智係第一個在生嘅人登上第3個島，而你地兩個就係第二同第三個。我由衷佩服你地。 盧綠：（冷笑）咁又有咩用喎... 盧葦：（玻璃內）阿哥...我可以見證舅父唔係講大話...同死前知道少少呢個世界嘅真面目...都叫完咗一個心願...只係仲未搵到婷婷...呢層就要靠你啦... 盧綠：阿葦...我點同阿媽交代啊！你又係咁，舅父又係咁，連阿爸都死埋！佢一定接受唔到咁大嘅打擊架！ 盧葦：（玻璃內）阿爸...死咗！？ 盧綠：佢喺大凶日之後就發病...唔夠一個星期就過咗身... 盧葦：（玻璃內）阿哥...對唔住啊...我... 黑烏鴉：好啦，時辰到啦。盧葦要上路啦。 盧綠：比我同阿葦傾多一陣啊！ 黑烏鴉：人就係咁，生前唔好好傾清楚，到死咗先留低咁多遺憾。好啦，要行啦。 盧葦：（玻璃內）阿哥...再見啦... 盧綠：（讀白）我望住黑烏鴉小姐穿過透明玻璃，然後帶阿葦行去嗰棵光禿禿嘅大樹...就算改變唔到任何野，但我都忍唔住不斷大叫 - 阿葦！阿葦！ *大力拍打玻璃聲效 *盧綠叫聲變成玻璃內音質 盧葦：（讀白）白烏鴉同半黑半白烏鴉，以及其他動物都離開咗。得返我同黑烏鴉小姐以及呢棵光禿禿嘅樹… 黑烏鴉小姐...跟住我要做啲咩啊？ 黑烏鴉：好簡單，你只要伸手掂住呢棵光禿禿嘅樹就可以啦。 盧葦：哦... *掂樹聲效 盧葦：（讀白）就算我伸手掂住棵樹嘅一剎那，好似有一股氣流通過我全身，再走入棵樹度，而棵樹好似被呢股氣流刺激咗，光禿禿嘅樹突然生長！ *樹木生長聲效 盧葦：（讀白）佢生出咗好多塊樹葉出嚟！ 黑烏鴉：你望唔望到有一塊樹葉係黑色架？ 盧葦：望到... 黑烏鴉：嗰塊既係樹葉，亦係你作嘅孽。 Zip噏劇場 Game of Eden 第二季 小島篇 第69回「黑烏鴉」 Cfun 飾演 盧綠 鄧添樂 飾演 盧葦 Kity 飾演 黑烏鴉 阿O 飾演 裘智 編劇及製作 阿攝 音樂 BEAT FRIDAY（All You Need, Other Love, Interval, Kaji, Ignorance, Round and Round, Time After） 封面設計 Followmelikeblack Leave a...

時間：180年9月21日 地點：封閉區域Area DB Island第3個島 盧綠：（讀白）繼續翻開舅父從未曝光嘅日記，佢喺失縱嘅第一日，原來去咗百草園搵調配新靈魂之水嘅方法... *揭頁聲效 裘智：（讀白）靈魂之水係由卡比木同九節木維迪斯葉所組成...我採摘足夠數量之後，就喺島嘅最右邊嘅樹林搵下一種藥材... *行過草叢聲效 成個百草園可以同飲完靈魂之水有類似作用嘅植物...就係佢！惡夢磨菇！ *採摘聲效 凡係食咗惡夢磨菇嘅人，輕則會發惡夢，重則會做出傷人傷已嘅夢遊行為...一百年前，我地裘氏知道佢嘅毒性之後，為咗唔好比其他村民誤食同濫用，我地會定時定候消滅喺枯木上面嘅惡夢磨菇。不過大自然嘅威力就係咁神奇，無論我地點樣做，惡夢磨菇隔一段時間都會生返出嚟。而更神奇嘅係，解到毒性嘅藥材，就係喺旁邊生長嘅短尾草。 我曾經食過一次惡夢磨菇...我夢見自己喺一個全黑嘅空間入面...手腳被鐵鏈鎖住，行唔到郁唔到...隔咗好耐...有一道光喺前面射過嚟...我隱約見到有一隻雀仔向我飛過嚟！ 跟住我就扎醒咗...雖然呢個夢唔算好恐佈...但手手腳腳被鎖住嘅感覺...到我醒返之後好似仲存在咁...所以嚇到我唔敢再食用... 不過為咗可以再睇到呢個世界嘅另一面...我決定要再挑戰一次！ *切藥材聲效 *生火聲效 *煲煮聲效 我將三種藥材加入水度煮，同一時間，喺旁邊燒著短尾草，以防一陣我真係中毒嘅時候，可以即刻用嚟解毒... 估唔到加咗惡夢磨菇之後，陣味好似變成磨菇湯咁。 *飲水聲效 飲落，無靈魂之水咁苦... *跌碗聲效 *心跳聲效 而我個心...跳得越嚟越快！同第一次飲靈魂之水嘅感覺差唔多！ *心跳加速聲效 但係...比上次跳得快好多！好多！ *跪地聲效 我成個人無晒力，瞓咗喺地上面... 突然眼前一黑...乜野都睇唔到！！！ *耳嗚聲 跟住所有風吹樹木嘅聲同海浪聲都無晒！淨係聽到耳嗚聲！ （回音）唔通...我又失敗咗！？會就咁死喺百草園度！？短尾草…去聞短尾草解毒！ *用力聞聲效 之後...我眼前嘅景像...全部都識郁嘅！更準確嚟講，我係好似感受到所有植物呼吸同養份嘅流動，而天上嘅星星同月亮呢啲原本靜態嘅景像，都好似螺旋咁轉動！ 我身體嘅所有感官全部被放大，昆蟲嘅腳步聲、蝴蝶嘅拍翼聲、水滴由樹葉滴落地嘅聲，都部都聽得好清楚！！！ 呢一刻嘅我！好似呢個島所有發生嘅事都知道咁！ 然後，我感應到喺好遠好遠嘅位置...嗰度有一棵白橡樹...然後我再感應到有一隻蜜蜂越嚟越虛弱...佢被一棵豬籠草食咗！但係嗰棵豬籠草比我嘅感覺，好似一個人...一個我曾經見過嘅人...棵豬籠草好似發現咗我，慢慢擰轉身向住我！ 去到呢個畫面，我成個人就覺得好攰...仲攰到瞓著咗！ *白鴿叫聲 （剛睡聲）原來...已經天光啦...唔係呢隻白鴿企係我頭上面叫聲我...我都唔知瞓到幾點...而尋晚見到嘅景像...即係代表卡比木嘅莖加九節木維迪斯葉再加惡夢磨菇同短尾草可以進入靈魂之水嘅狀態！ *白鴿拍翼 隻白鴿見我醒咗，就向山頂平原嘅白橡樹嘅方向飛走咗...我都即刻執好裝好嘅藥材，向同一個方向進發！因為我想引證一件事！就係尋晚嘅感應！ *步行聲效 行咗好耐，終於到達山頂平原，我搵到嗰棵豬籠草！而入面真係有一隻死咗嘅蜜蜂！ 我連咁遠嘅蜜蜂都可以感受到！ 玄武大帝！就算你消除咗靈魂之水喺我身上嘅效用！但你應該估唔到我可以搵到另一種調配方法！！！ 依家我就出發去第三個島！ *出海聲效 我上返船出發去千獸島，但好有趣嘅係，叫醒我嘅白鴿飛咗落嚟我架船頭嗰度，佢擔住一粒白橡樹果實。 過咗幾日，佢都無飛走，而我亦都登上咗千獸島。呢隻白鴿行徑好古怪，所以我決定跟縱佢！幾經辛苦...我終於跟到佢，去嗰棵成百米高嘅巨型蘇木度！ 佢飛到去樹頂，將嗰粒白橡樹果實放入自己嘅鳥巢。同一時間，有另一隻白鴿都飛咗返嚟，佢口擔住嘅唔係果實，而係樹葉...呢個情景，咪同我上次飲靈魂之水去第三個島所見嘅情節類近！即係千獸島係白鴿嘅基地，佢地會飛去百草園同第三個島搵唔同嘅物件！ 原來去第三個島嘅提示一直都係度！只係我地唔察覺！ 葦仔！舅父我終於講得出做得到啦！ *刮木聲效 為咗令葦仔知道呢個提示，所以我喺沿途劃好晒所有嘅線索，包括喺蝙蝠洞畫圖案，喺樹上面劃指示同方向！我相信以葦仔嘅能力，一定可以搵到我留低嘅線索！ *出海聲效 *狂風雷暴聲效 第3個島就喺千獸島嘅東面...但東面幾遠呢？但我估唔到再出發嘅第一日就打風！但係我帶嘅糧草只能夠撐多一個星期...我一定唔可以有事！我一定要去到第3個島！終於過咗幾日之後... 個風終於走咗...我行返出船頭 *白鴿聲效 就見到白鴿係頭頂上面飛過！ *船帆聲效 我即刻開帆，順住風，跟住白鴿向東面方向駛過去！ *沙灘上腳步聲 第3個島離千獸島大約700-800公里，4日左右嘅船程就到。一上到岸，我有啲失望...因為呢個島方圓好多里，但只係得一片一望無際嘅黃土大地...我唯有跟住隻白鴿一直行。終於，行咗好耐...隻白鴿飛咗落一棵佈滿白色小花嘅樹，呢棵樹嘅外形同香味，係我從來都未見過嘅...我再細心一望，呢棵樹得一粒綠色，好似鵪鶉蛋咁大嘅果實。上次我靈魂出竅嚟到呢度，除咗呢棵樹之外，仲有其他動物架... 唔通... *筆劃聲效 葦仔，今日係180年3月14日。我準備再飲加入咗惡夢磨菇嘅靈魂之水。希望我可以親口將我所見所聞講比你聽，而唔駛要你嚟到呢度搵到呢本筆記...先知我發生咩事啦... *揭頁聲效 盧綠：（讀白）舅父嘅日記...就寫到呢一頁...即係佢喺呢個島度失蹤...事隔咁多個月舅父都無返嚟...睇嚟...應該凶多吉少... 雖然依家我知舅父唔係講大話...但為咗證明呢個世界所謂嘅真相...真係值得咩？ *白鴿拍翼聲效 一路眼望西邊嘅白鴿飛返去千獸島...葦仔會行咗去邊呢？舅父所指嘅奇怪景像...又喺邊呢... *步行聲效 舅父嘅日記話佢靈魂出竅之後被度怪力扯咗去西邊，所以我一直向西行...但呢個島根本乜都無...究竟要行幾耐先搵到葦仔啊？ 行咗唔知幾多公里...我攰到原地瞓著咗...我仲發咗一個夢...係一好暗嘅空間，有一個人手腳被鎖鏈鎖住...佢就係... 裘智：（回音聲效）綠仔！快啲救阿葦！千祈唔好比佢飲靈魂之水啊！ 盧綠：（回音聲效）舅父！我可以喺邊度搵到你地啊！ 裘智：（回音聲效）總之你一直向西行！一直行！唔好停啊！！！ *鎖鏈聲效 盧綠：（回音聲效）舅父！你唔好走啊！舅父！ 究竟係我睇完舅父嘅日記，令我發夢會見到佢？定係點呢... 不過既然舅父話向西一直唔好停，咁我唯有咁做啦！ *奔跑聲效 我一直跑一直跑！（喘氣）跑到...一個舅父日記提到嘅地方，一個充滿霧氣嘅地方... （大叫）葦仔！你係咪喺度啊！葦仔！ 我越行越入，啲霧越嚟越大...大到我都分唔到方向... *跌到聲效 唉喲！ 我踢到啲咩呢？ 盧葦：（虛弱）阿...哥...我... 盧綠：阿葦！阿葦！我終於搵到你啦！！！ Zip噏劇場 Game of Eden 第二季 小島篇 第68回「舅父的留言（下）」 阿O 飾演 裘智 Cfun 飾演 盧綠 鄧添樂 飾演 盧葦 編劇及製作 阿攝 音樂 BEAT FRIDAY（Recharge, Distance, List, Tonal, Stack, Blank, Surface, Round and Round） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island第3個島 盧綠：（讀白）翻開舅父從未曝光嘅日記，第一頁嘅日期係180年3月3日，即係佢出海然後失蹤嘅第一日...佢回顧返兩個月前，同我爸爸盧和飲酒嘅事...當晚阿爸飲醉咗酒...仲話咗比舅父知參見玄武大帝嘅方法...跟住舅父真係飲咗靈魂之水...見到呢個啞鈴洲嘅真相，即係呢個世界嘅真正顏色...佢仲靈魂出竅，飛越百草園、千獸島同我身處嘅第三個島！可惜，一度雷劈落佢度，就一瞬間就返到去北帝廟啦... *揭頁聲效 裘智：點解千里眼同順風耳神像有綠色碼同灰色碼嘅？究竟呢啲顏色係咩意思！？ K Area DB Island：又係你啊，裘智。連埋今次，你已經係第三次飲靈魂之水啦... 裘智：把聲...喺順風耳神像傳過嚟嘅？你...係順風耳神？ K Area DB Island：我既係北帝，又係順風耳，亦都係千里眼 裘智：即係...三位神原來係三位一體神嘅？太好啦！我地裘氏每一日都望日觀星，就係想推算你回歸嘅日子！我今日終於都見到你啦！我有好多野想問（被打斷） K Area DB Island：你做嘅每一件事我都知道。包括前兩次你飲靈魂之水嘅經過。 裘智：兩次？但今次先係我第一次飲靈魂之水咋喎！ K Area DB Island：10年前嘅同一日，盧和飲醉酒，同你講唔想做呢個虛構世界嘅村長，教你飲靈魂之水。5年前嘅同一日，盧和又飲醉，亦講同一番說話同教你飲靈魂之水。到咗今日，就係第三次。 裘智：10年前？5年前？飲靈魂之水參見玄武大帝咁大件事，我無可能唔記得架！無可能架！ K Area DB Island：咁係因為我洗咗你地兩個嘅記憶。但估唔到你地會重複犯錯。唔通呢個就係人性？同求知慾？ 裘智：犯錯？參見你點會係犯錯啊？ K Area DB Island：因為只有盧零嘅後裔可以做村長，有權知道呢個世界所有真相。裘智，對唔住，若果唔係盧和口講比你做村長，系統都唔會出錯，令靈魂之水係你身上起到作用。不過我嚟就係修正呢個錯誤。 裘智：你意思係得盧氏可以，但我地裘氏同凱氏唔得？我唔明啊！我地兩大家族一直都好遵守你留比我地嘅世界同教誨！唔會比盧氏做得少！ K Area DB Island：呢條係創建呢個世界嘅規則，維持大家嘅平安，係需要付出代價。 裘智：所以...你又想洗我腦！？但我肯定一年之後，姐夫又會飲醉酒，佢又會唔想做村長，又叫我去做，因為我太熟悉姐夫嘅性格，同埋我係呢條村求知慾最強最想知道真相嘅人！ K Area DB Island：乜真相真係咁重要咩？ 裘智：係！我覺得出生喺呢個世界最重要，亦係最快樂嘅就係求知！ K Area DB Island：重要到你可以付出所有？ 裘智：與其做一隻快樂嘅豬，我情願做一隻不斷探險嘅雀仔！ K Area DB Island：但知識同真相可能都係一個囚牢嚟。 裘智：但至少我試過！ K Area DB Island：既然係咁，我唔會清洗你嘅記憶。但就算你再飲靈魂之水，都唔會有效。 裘智：到時我同其他村民講，就算有無效都會一樣！ K Area DB Island：創建呢個世界嘅其中一個承諾，就係賦予你地若干嘅自由意志。我就當你係一個實驗，睇下你可以走到幾遠。 *雷劈聲效 *雀仔叫聲 裘智：（睡醒）我個頭...好痛...尋晚... 盧和：（緊張）阿智！尋晚我！ 裘智：（打斷盧和）姐夫！你快啲話比我知點解飲完靈魂之水，成個世界會變咗墨綠色同灰色點點嘅？仲有我同你最內層嘅顏色係唔一樣架！ 盧和：阿智！我對你唔住！我唔應該話比你知參見玄武大帝嘅方法！係我害咗你！不過玄武大帝話唔會懲罰我同你！所以 裘智：（打斷盧和）姐夫，所以你要話比我知你知嘅所有事！究竟玄武大帝係點樣嚟！仲有點解你會話呢個世界係虛構嘅！？ 盧和：（心虛）呢一層...我唔可以... 裘智：姐夫！我地所有村民一直都期待玄武大帝回歸！所以我地裘氏不斷觀察推算，而凱氏訓練自己海戰嘅技能，就係怕九頭海蛇會復活！姐夫，你明明知道所有真相！點解唔話比所有人知呢！？ 盧和：（心虛）我真係唔可以... 裘智：唔通我地唔配知道實情咩？ 盧和：唔係唔配，總之為咗啞鈴洲同大家嘅安全，就係唔可以啦！我一個人去承受就得架啦！ *開門聲效 裘仁：阿智，原來你真係喺度，今日到你喺觀星閣當值啊！ 裘智：仁叔，我尋晚飲咗靈魂之水！見到呢個世界係由綠色同灰色點點所構成架！仲有，我地每個人最內層都有唔同嘅顏色！連某啲花草樹木同動物都有！ 裘仁：靈魂之水？阿智，你講咩啊？ 盧和：阿仁，你唔駛理佢，尋晚我同佢都飲醉咗！所以佢夢到乜就講乜囉！ 裘智：（好認真）我無發夢！我仲見到玄武大帝添！ 裘仁：你見到玄武大帝？ 裘智：仲要原來我之前已經見過佢兩次！只係佢洗咗我嘅記憶！ 盧和：阿智！你想見玄武大帝想到發夢都見到佢啦！ 裘智：我都話無發夢囉！我仲去咗第三個島啊！就喺千獸島東邊 盧和：（急急打斷）第三個島喎！邊有可能唔係發夢呢？ 裘仁：阿智，仁叔我最客觀嘅，你話你去咗第三個島，咁航海紀錄呢？坐標呢？ 裘智：呢一刻無... 裘仁：阿智，睇嚟你尋晚真係醉啦。你快啲去梳洗，然後去觀星閣當值啦。 裘智：仁叔，連你都唔信我？ 裘仁：我地裘氏信嘅係證據。 盧和：好啦好啦，阿仁，我會帶阿智返屋企換套衫，好快過嚟。 裘仁：阿和，作為村長嘅你都唔好飲咁多啦。 盧和：得啦！ *關門聲效 裘智：姐夫，你知我講嘅野係真架。 盧和：阿智...我地以後可唔可以唔好再提尋晚有關靈魂之水嘅事啊... 裘智：即係你間接承認我尋晚嘅經歷係真，唔係幻覺啦。 盧和：阿智，尋晚大家都飲多咗...所以... 裘智：所以你就唔敢認？雖然佢話飲靈魂之水係我身上唔會再有任何功效，但只要我搵到第三個島，就可以證明我所見到嘅事！ 盧和：點都好...可唔可以唔好同綠仔、葦仔佢地透露尋晚嘅事啊？ 裘智：你用村長身份命令我？ 盧和：係親人嘅身份...我想大家簡簡單單同幸幸福福咁喺度生活落去啊... ----------------------------- 裘智：（讀白）嗰日之後，我就自己去咗百草園，收集卡比木同九節木維迪斯葉去製作靈魂之水。但可惜...真係比姐夫所講嗰個人工智能封咗喺我身上嘅效果...但我無咁容易放棄！所以，我以靈魂之水做基調，嘗試加入百草園唔同嘅草藥，希望可以產生作用！ 嗰一個月，我係自己嘅鍊藥房不斷試...結果... *煲水聲效 *飲水聲效 盧和：嘩...好苦啊！不過唔緊要...最緊要...有...效... *盧和辛苦抽搐聲效 *掃低枱櫈聲效 盧和：靈魂...之水...呢個世界...以外...仲有其他世...界... *倒地聲效 ---------------------------- 裘智：我以為...我終於試到另一種靈魂之水...但原來只係我中毒嘅幻覺...嗰一日我出現幻覺嘅情景...被好多村民見到...佢地嘅反應係... 村民甲：裘智又試藥啦，我諗佢想見玄帝大帝想到傻咗啦！ 村民乙：又話咩呢個世界以外有其他世界，又話有咩綠色、灰色點點，睇嚟佢真係有幻覺！真係有病啊！ 村民丙：或者真係有天外天，同島外島。但佢講，我就唔信啦！大家都唔好黐佢咁多添啊！ 裘智：最後，我被村民認為係傻同癲嘅...我突然明白...嗰個人工智能點解唔洗走我嘅記憶。因為靈魂之水無效用，我就無證據證明自己，村民亦唔會相信...嗰刻真係覺得自己好無能...但唯獨葦仔...佢由始至終都相信我...所以，我唔可以令佢失望！我決定再去百草園試藥，以及出發去第三個島！ *海浪聲效 裘智：幾個時辰嘅船程，足夠我回憶呢兩個月發生嘅事，我一一寫落呢本日記度。然後，我就登上百草園，去搵下一款可以發揮到功效嘅藥材。而其實，我都有啲眉目啦！ Zip噏劇場 Game of Eden 第二季 小島篇 第67回「舅父的留言（中）」 阿O 飾演 裘智 Cfun 飾演 盧綠 阿信 飾演 第5任村長 盧和 Alton 飾演 K Area DB Island 編劇及製作 阿攝 音樂 BEAT FRIDAY（Recharge, List, Surface, Two, Almond, Camel, Rain or Shine） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

時間：180年9月21日 地點：封閉區域Area DB Island 第3個島 盧綠：（讀白）我跌落山涯，原本以為會無命，點知被鬚鯨救咗，仲登上咗第3個島！ 我喺淺灘發現盧葦用過嘅木筏，可惜唔見佢嘅縱影...之後，一隻白鴿出現，我跟著佢飛嘅方向搵到一棵從未見過啲樹，樹上面有舅父留低嘅線索！我沿住箭嘴指嘅方向掘泥 *掘泥聲效 然後搵到一個牛皮袋，袋入面有兩本舅父嘅筆記...一本係被阿葦拎咗嘅百草園同千獸島嘅圖鑑...另一本係我從未見過嘅日記...我揭開第一頁...上面寫上嘅日期係180年3月3日...即係舅父失蹤嘅第1日！ *回憶聲效 *海浪聲 盧葦：（由遠至近）喂！舅父！喂！（喘氣聲效）舅父！你出海做咩唔話我知啊！ 裘智：葦仔，舅父明明已經好小心，揀喺天未光，大家都熟睡嘅時候起行，但咁都瞞唔到你 盧葦：因為我盡得舅父你嘅真傳囉！你睇！我已經執好行裝啦！我地今次又去百草園？定去千獸島啊？ 裘智：葦仔...今次舅父想自己一個人出海啊... 盧葦：點解啊？你係咪嫌我幫唔到手？定係阿爸唔比你帶我出去？你唔駛聽佢講架！ 裘智：葦仔...你都知其他村民點講我架啦... 盧葦：我知！佢地話你發神經，話見到呢個世界以外嘅世界，係發癲亂噏，但我信架！係你教我要抱有懷疑啲精神去思考！所以，呢個世界以外，真係可能有其他世界架！ 裘智：葦仔...或者舅父真係亂噏呢...我又無辦法證明到比你睇... 盧葦：咁我地一齊去你講嘅第三個島！證明比村民睇，呢個世界有幾咁大！ 裘智：其實舅父我無真係去過... 盧葦：有無去過都唔緊要，我地一齊去搵咪得囉！ 裘智：葦仔，好快就係你生日，萬一我地遠行趕唔切返嚟，咁以後我地就真係無可能一齊出海探險啦...舅父應承你，會盡量趕喺你生日前返嚟，好唔好？ 盧葦：如果唔得呢？ 裘智：咁舅父就將我多年探險嘅筆記送比你！ 盧葦：我點知你放喺邊喎～ 裘智：你真係以為我唔知你成日都想偷偷潛入我間房度偷睇我嘅筆記咩～ 盧葦：哈哈...比你發現咗添... 裘智：舅父大你一轉生肖，你嘅言行舉止同我最似，你一個眼神舅父都知你想點啦！ 盧葦：好啦...咁舅父你萬事小心啊！ 裘智：放心，今次舅父一定會有所發現嘅！ 盧葦：舅父！一路順風！ *落帆聲效 *帆船出海遠行聲效 裘智：（讀白）同葦仔道別之後，我就順住風向，向百草園進發。4個時辰嘅船程，我腦入面不斷回想兩個月前，我同姐父，即係綠仔、葦仔、婷婷嘅爸爸，亦係啞鈴洲第五任村長盧和，喺北帝廟後庭嘅村長工作房入面飲酒嘅情景... *飲酒聲效 盧和：（少少醉）阿智！我地繼續飲！ 裘智：姐夫啊...你今晚飲得太多啦...家姐叫我好好睇住你啊... 盧和：（少少醉）我五十歲大壽都唔可以飲多啲！咁幾時飲啊！？ 裘智：好好...我陪你飲多杯！ *倒酒聲效 裘智：飲完，就返屋企好好休息啦姐夫... *飲酒聲效 裘智：姐夫...其實你今日做咩飲咁多... 盧和：（少少醉）因為...我好唔想阿綠接任做村長啊... 裘智：阿綠佢跟你學做村長咁耐，表現一直都好好，佢接手應該無大問題架？定係...你想阿葦接任？ 盧和：（少少醉）個個都唔想！做呢個地方嘅村長有咩意思！？ 裘智：姐夫...我唔係好明你講咩喎... 盧和：（少少醉）阿智！你唔係成日問點解太陽要由東邊升起？仲有究竟係太陽圍住我地轉，定我地圍住太陽轉？同埋北斗七星同其他星星係點樣架咩？ 裘智：我地世世代代教嘅...係玄武大帝創造同安排架嘛... 盧和：（少少醉）所以，你唔駛白費心機，整啲咩漂流樽，喺入面寫訊息，搵啞鈴洲以外嘅人！因為根本無，呢個世界仲有玄武大帝都係假，係作出嚟架！！ 裘智：姐夫...睇嚟你好大壓力...同埋你真係醉啦... 盧和：（少少醉）我無醉！你咁鍾意問呢樣問嗰樣，成日問到我口啞啞！我依家比機會你問玄武大帝！ 裘智：姐夫...唔好玩啦...世世代代得盧氏村長可以同玄武大帝溝通... 盧和：（少少醉）由我得知呢知世界嘅真相開始，就要日日都對大家講大話！我已經講到好辛苦啦！我唔想再做呢個虛構世界嘅村長啦！由你去做啦！ 裘智：姐夫...你講真架？ 盧和：（少少醉）參見嗰個人咩智能嘅方法，喺木箱入面... *跌落枱聲效 裘智：（讀白）姐夫就咁醉咗喺枱面...姐夫所指嘅木箱...就喺呢間房嘅書枱上面...作為裘氏嘅子孫...「求真」一向都係我地嘅信念...不過我地求嘅係玄武大帝留低比我地嘅真理...雖然我經常問書本以外，同埋老師答唔到，村民亦無思考過嘅問題...但我無一刻質疑過玄武大帝嘅存在...我只係想用盡方法去理解玄武大帝創造呢個世界所有奇妙之處...全能嘅玄武大帝無可能只係創造啞鈴洲、百草園同千獸島咁簡單...呢個世界一定好大，一切嘅未知只係佢比我地嘅考驗，追尋真理就係更接近佢嘅方法！ 但呢一刻...同玄武大帝溝通嘅方法...就係我面前...我...應唔應該打開呢...? *打開木箱聲效 入面有兩種藥材...一款係卡比木嘅莖...另一種係九節木維迪斯葉！姐夫嘅村長日誌話將佢地剪碎，磨成粉，再加入水煮，就可以成為「靈魂之水」？原來我之前偷睇姐夫整嘅藥水，就係同玄武大帝溝通嘅方法！呢兩種藥材原來可以咁用嘅！ *剪樹枝聲效 *煲水聲效 *倒水聲效 不過煮出嚟嘅味...好難聞... *飲水聲效 嘩...飲落去...好苦同好難飲... *心跳聲效 我嗰心...突然跳得越嚟越快！快到... *耳嗚聲效 點解...我眼前嘅枱櫈全部變成墨綠色嘅點點嘅？係咪我對眼有事！？ 而房入面嘅植物好奇怪！除咗墨綠色點，仲有灰色點點！ 但姐夫仲奇怪！因為佢最外面係墨綠色點，中間係灰色點點，最內層係紅色嘅！？ 我對眼發生咩事？ 我隻手同姐夫一樣！外層係墨綠色，中間係灰色，不過最內層係紫色嘅？ 跟住...我覺得自己越嚟越輕...好似慢慢飄起咁...我開始控制唔到自己嘅身體！ 我！真係升到半空！仲離開咗自己嘅身體添！ 我係咪死咗啊！？？？ *穿梳聲效 我望住得返墨綠色同灰色點點嘅身體，好平靜嘅企咗度。而呢刻嘅「我」得返紅色點點，我用盡全力想返入自己嘅身體入面，但無論我點用力，我都控制唔到自己嘅身體... 「喂！姐夫！救我啊！」 但姐夫昏睡緊，完全聽唔到我嘅呼叫！ 突然之間，喺我頭頂有一度好強嘅力扯走我，帶我穿過屋頂，離開咗間屋，升到半空位置！ 依家已經喺深夜時間，村民都瞓晒覺...而我竟然穿過雲層！ 我升得越嚟越高，高到月亮好似喺我隔離咁！ 跟住嗰度力再加大，一扯之下，我竟然秒速去到百草園嘅上空！俯視百草園所有植物！大部份嘅植物都只係得墨綠色同灰色點點，但有極少部份同我一樣有第三種顏色！ 嗰度不知名嘅力又再加大！再扯我飛去另一個地方，下一秒，我就出現喺千獸島嘅上空！原來千獸島都有唔少嘅動物都有第三隻顏色！包括瞓緊覺嘅獨角獸！ 我凝視咗獨角獸一陣，佢好似感應到我望住佢，佢紮醒然後望向喺高空嘅我！仲大叫咗一聲！ *獨角獸聲效 佢一撕叫完，度力再扯我向東面嘅位置！今次又係極速橫越海洋！瞬間嚟到一個我地啞鈴洲村民從未見過嘅島！ 原來真係有第3個外島存在！ 突然嗰道力扯咗我落地！ 唔駛一秒...我就企咗喺一棵佈滿白色小花嘅樹前面...跟住有一隻白鴿飛過，佢叼走塊樹葉就向返千獸島嘅方向飛走咗... 然後嗰度力又慢慢扯我向西面嘅方向行... 呢個島究竟有咩特別同用途呢？ 度力慢慢帶我去到一個好大霧嘅地方... *動物腳步聲效 我聽到有啲動物嘅腳步聲由遠處傳過嚟... 係一隻翔羊...佢身後有一條蛇...仲有一棵識行嘅樹？ 佢地無晒墨綠色同灰色碼...各自有唔同嘅顏色... 我跟住佢地一直行，行咗一陣...終於見到另一棵大樹，一棵光禿禿嘅大樹...樹旁邊有7隻母雞... *拍翼聲效 *烏鴉叫聲 然後，有3隻烏鴉飛到喺我地前面。一隻白色，一隻黑色，一隻半黑半白。 白色烏鴉慢慢掃視我地，目光去到我身上面就停咗。佢好似用好奇嘅眼光望住我，跟住突然大叫咗一聲！ *雷聲 有一度雷由天而降劈落我度！ 啊！！！ *雷聲 當我再擘大眼...原來我已經返到去北帝廟...仲返返去自己嘅身體，但就走咗出房，去咗北帝神像前面...北帝神像只係得墨綠色碼...但千里眼同順風耳神像就有墨綠色同灰色碼... 跟住...我聽到一把聲由順風耳神像度傳出嚟... 「又係你啊，裘智。連埋今次，你已經係第三次飲靈魂之水啦...」 Zip噏劇場 Game of Eden 第二季 小島篇 第66回「舅父的留言（上）」 阿O 飾演 裘智 Cfun 飾演 盧綠 鄧添樂 飾演 盧葦 阿信 飾演 第5任村長 盧和 Alton 飾演 K Area DB Island 編劇及製作 阿攝 音樂 BEAT FRIDAY（Recharge, With you, Treat, Stack, List, Surface,Extension） 封面設計 Followmelikeblack Leave a comment and share...

時間：180年9月21日 地點：封閉區域Area DB Island 未知島嶼淺灘 *海水拍打岸邊聲效 盧綠：（讀白）被獨角獸召喚出嚟嘅猛獸撞飛出山涯之後，喺我失去意識之前，我隱約記得我被一隻不知名嘅巨大生物吞咗入口...原來嗰隻巨型生物，就係我面前不遠處，有20-30米大嘅巨型鯨魚！ *鯨魚叫聲 根據裘氏家族嘅觀察記錄，呢種巨型嘅深海鬚鯨出現喺千獸島附近嘅海域，佢地生性溫馴，亦都好有靈性...但估唔到佢有靈性到救咗我一命... （大聲叫）「多謝你啊...鬚鯨...」 *鯨魚叫聲 鬚鯨佢嘅頭繼續望住我，聽完我大聲講多謝之後，好似用佢嘅叫聲回應我咁... *海豚叫聲 然後，有3、4隻海豚喺鯨魚附近嘅水底跳出水面，然後好快咁游過嚟我身處嘅淺灘度。 *海豚叫聲 呢一刻我好想飲靈魂之水，因為我好想睇下眼前嘅海豚同鯨魚有無靈魂嘅顏色...可惜...喺跌落山涯之後，我帶嚟嘅所有物品都無晒... *踩水聲效 然後，我行近嗰幾隻海豚，佢好眼定定咁望實我，好似想同我溝通咁... 跟住...我回想返阿達第一次出現喺我面前嘅情景...當時佢喺北帝神像爆出嚟之後，發出一種聲音... 好似係... （細聲）OM…？ 都係啟動唔到全知狀態添... 試下再大聲啲... （中偏大聲）OM！！！ *海豚叫聲 可惜...都係唔得... 「喂，海豚、鬚鯨！雖然我無辦法可以同你地溝通...不過...無論你地只係好似海牛咁係普通嘅動物，或者好似係食人花咁有靈魂顏色，點都好啦，我盧綠都好感謝你地嘅救命之恩！我要繼續上路啦！再見！」 *海豚叫聲 *鯨魚叫聲 *鯨魚噴水聲效 答謝完佢地之後，海豚同鯨魚就轉身，然後慢慢潛返入海裡面。而我就行返上淺灘。 呢個淺灘只有3、400百米大...究竟呢度係邊度呢？唔通就係舅父所講嘅第3個島？如果係咁，咪即係阿葦都係度！？ *海水漂蕩聲效 然後，我好子細咁掃視呢個淺灘，終於比我發現有一條未被吹散同沖散嘅拖痕！我即刻沿著條拖痕行去搵線索！最後，我喺淺灘左前方一堆有人咁高嘅石頭後面搵到一艘單人木筏！ 其中一塊木板上面有4個用短刀劃嘅交叉圖案！ 村民話9月2號嘅朝早發現有一艘出海打魚嘅船同木筏唔見咗，應該係比阿葦偷咗嚟出海。依家得返呢艘木筏...唔通打魚嘅船出咗事，令阿葦要用木筏登島？ 咁嗰4個交叉，難道代表佢用咗木筏4日？ 我即刻跑上石灘上嘅平原！ 出現喺我面前嘅係一望無際嘅黃土大地...唔好話人或者動物...呢度根木連一條草都無！ （大叫）阿葦！你係邊啊！我睇到你嘅字條！我嚟咗啦！！！ 可惜...無論我點嗌...都無回應... *打地聲效 可惡！嚟到呢度先無晒頭緒同線索！！！ *拍翼聲效 等等先！有野飛緊過嚟！ *白鴿聲效 係白鴿啊！ 上次隻白鴿叼住一塊樹葉兼綁住阿葦嘅字條飛返嚟千獸島，依家又有另一隻白鴿飛嚟呢度，即係佢係飛去搵屬於嗰塊樹葉嘅樹！ 一定係咁！ *拍翼聲效 所以，我即刻跟住隻白鴿飛嘅方向跑！大約跑咗半個時辰左右...（喘氣聲）雖然都係唔見阿葦嘅蹤影...但我終於喺呢一片黃土大地望到唯一一棵綠色嘅植物啦！ 呢棵樹高約3米，樹幹畢直而茂盛，樹葉呈橢圓形，仲佈滿好多白色嘅小花。不過咁大棵樹得3粒細小嘅果實，一粒黑色，一粒紫色同一粒綠色。呢幾粒果實好似啲鵪鶉蛋咁，得幾厘米大。我好似無喺啞鈴洲或者百草園見過呢種植物或者果實... 而隻白鴿企咗係其中一條樹幹上面，佢無叼走任何樹葉，而係望實西面。 然後我聚精會神望住呢棵樹，留意阿葦有冇留低啲咩線索比我。 結果，我喺主樹幹一米高嘅位置，見到一個用刀刻畫嘅箭嘴，指住右下角，上面仲塗上深黑色嘅墨水！即係阿葦又搵到舅父留低嘅指示！ 我照箭嘴嘅方向望過去，發現被指住嘅地面微微拱起！ *掘泥聲效 我即刻用手掘開啲泥土，唔駛一陣，我掘咗一個半隻手臂咁深嘅坑！跟住發現一個用牛皮整嘅袋！ *開索袋聲效 打開一睇！係兩本筆記...一本...係畫滿百草園同千獸島不同動、植物特性嘅筆記...畫功、文筆同詳細程度比仁叔同阿雪有過之而無不及... *揭頁聲效 而最後幾頁...更記載咗靈魂之水嘅製作方法... 上面嘅字跡...我呢一世都唔會忘記...因為就係舅父 - 裘智 嘅字跡...智舅父半年前失蹤...阿葦就拎住佢本筆記周圍去百草園同千獸島探險...希望可以搵到舅父...而阿葦真係成功嚟到第3個島... 至於另一本筆記，都係舅父嘅字跡...第一頁寫上嘅日期...係180年3月3日...即係舅父失蹤後嘅第1日！ Zip噏劇場 Game of Eden 第二季 小島篇 第65回「第3個島」 Cfun 飾演 盧綠 編劇及製作 阿攝 音樂 BEAT FRIDAY（Week, Just Frame, Almond, Two） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

地點：封閉區域 Area DB Island 千獸島 *猩猩叫聲 *樹藤生長聲效 *達鼻寒聲效 達：（讀白）嗯...（口水聲）嗯... *猩猩大叫聲效 *樹藤鞭打聲效 達：（紮醒）啊！！！咩事！！！ *猩猩叫聲 達：嚇死人咩！！！比人瞓下都唔得！！！ *風吹聲效 達：（讀白）同獨角獸大戰，成功同有翼猩猩、食人花合打贏獨角獸，將佢射成粉碎，被黃紙吸受之後，我就攰到喺原地瞓著咗...一瞓就瞓咗成晚...我行去巨型蘇木旁邊嘅山頂平地嘅山涯邊，呢度有成一百米高...盧綠喺咁高嘅位置跌落去...根本無可能生存到... 我轉身望住食人花同有翼猩猩，佢地竟然係度玩緊拋石頭。猩猩刻意拋高 *樹藤伸長聲效 食人花即刻伸長樹藤接住大石，然後用力拋過去比猩猩。不過食人花都好似刻意整蠱猩猩，因為佢拋得比剛才更高 *拍翼聲效 猩猩要拍翼飛高先接得到。諗起佢地兩個以前都係凱氏嘅村民，仲有可能係兄妹關係，隔咗一世同經歷咁多事先可以重遇，依家嘅拋石畫面就好似兩個小朋友喺度玩緊拋波咁。 我慢慢行到佢地身邊，佢地就停咗然後望住我。猩猩收埋對翼坐喺我面前，食人花就彎低自己嘅樹幹，花蕊移到猩猩塊面旁邊，好似等候我落命令。 我望一望我隻左手上面嘅交叉疤痕，再望一望右手嘅獨角獸黃紙，背面寫住 40年 - 81年 盧如 81年 - 現在 獨角獸 呢度嘅40年，即係現實世界嘅2062年，亦即係Fish入嚟呢度嘅年份...即係佢喺度過身之後，就變成獨角獸？ 然後內心又諗起 AI Zero喺Area Zero同我講「善用D嘅能力」呢句說話。唔通佢所講嘅D，係解做Damage？即係我有毁壞呢個封閉區域事物嘅能力？ 當我伸出左手，猩猩同食人花即刻退後幾步步，然後互相對望咗一陣，跟住就行返去我面前...猩猩竟然單膝跪喺我面前，左手就捉住食人花其中一條樹藤！好似手拖手咁！ 我用左手摸一摸猩猩嘅頭，猩猩緊張到合埋眼！ 我明白佢地驚啲咩，所以，我即刻同佢地講：「多謝你地！你地自由啦！」 *拍翼聲效 *猩猩叫聲 猩猩開心到拍翼飛起兼轉咗幾個圈，食人花又震出一陣花粉，吸引咗十幾隻蝴蝶飛過嚟！呢個...真係一個奇怪又有趣嘅畫面。 然後，我慢慢執返起喺地面上面盧綠留低嘅物品，我又點著一支火柴。 *火柴燃點聲效 *燒黃紙聲效 我燒咗畫有獨角獸嘅黃紙，唔駛幾秒，尋日仲同我地激戰嘅獨角獸就再次出現喺我面前。 *獨角獸叫聲 *全知狀態聲效 因為獨角獸本身嘅靈魂顏色同我一樣都係紫色，所以呢一刻我都唔知佢會唔會同食人花、有翼猩猩咁聽我嘅指令。所以，我同佢講： 「我知你成為獨角獸之前係盧如 Fish….因為之前嘅大凶日，即係Game of Eden server reboot嘅時候出咗錯誤...盧婷唔小心離開咗封閉區域而入咗Area 15…而佢被九頭海蛇捉咗...所以我入嚟嘅目的係想搵返你嘅後代盧婷..我係無惡意架...」 *獨角獸叫聲 獨角獸點一點頭，我就繼續講：「既然你喺666組織嘅成員，亦係第一批入嚟封閉區域嘅人，應該知道呢度嘅秘密？」 *獨角獸叫聲 「你可唔可以帶我去第三個島？或者...飛去可以搵到盧婷或者盧綠嘅地方？」 *拍翼聲效 獨角獸拍翼，頭仰後，示意叫我坐上去佢背度 「大猩猩，食人花！再見啦！」 *食人花、猩猩叫聲 *拍翼聲效 然後，我就坐上獨角獸度，佢助跑、拍翼，跳起！飛出千獸島嘅山涯！帶我飛去搵盧婷以及盧綠。 -------------------------------------------------------------------------- 莫十三：（讀白）阿達坐住獨角獸，向下一個島出發嘅時候，前一日大戰獨角獸，被獵豹撞飛出山涯嘅盧綠...依家身處喺一個全黑嘅地方... *滴水聲效 盧綠：呢度係...黑到乜都睇唔到...唔通我已經死咗...返咗玄武大帝嘅懷抱？ 痴線！ 呢個世界根本無玄武大帝...一切只係盧零創作出嚟嘅故事... 咁我依家喺邊呢？ 地下滑潺潺...仲有好大陣魚腥味... 有好虛弱嘅呼吸聲喺前面傳過嚟... 可惜我無曬靈魂之水同靈魂之粉喺身...啟動唔到全知狀態...唯有摸黑爬去前面... 唔駛幾步...我終於摸到嗰個發出微弱呼吸聲嘅生物... *鼻聞聲效 真...真係一條魚嚟架！！！ 咁我依家即係喺邊啊！！！ *大力拍打聲效 喂！！！喂！！！有冇人啊！！！ 冷靜啲先...我嚟呢度之前...係同阿達喺千獸島同獨角獸以及佢召喚出嚟嘅動物戰鬥緊... 我打贏猩猩跑去幫阿達嘅時候...就被獵豹撞飛落山涯...雖然捉實咗山涯下邊嘅樹幹，但都係承受唔到我嘅重量...樹幹一斷，我就跌咗落去... 喺跌落海之前，我仲用盡全力拋我所有嘅物品比阿達添... 嗰時我先知道...原來一百米真係好高...但我仲隱約聽到獨角獸發號施令嘅叫聲... *獨叫獸叫聲 仲有50米...我就會跌落大海...如果係最熟水性嘅凱安...會唔會可以平安入水...再游返上水面呢？ 仲有20米... *拍翼聲效 *鷹叫聲效 唔係啊嘛！呢個時候，仲有3隻獵鷹飛過嚟攻擊我！？ *拍翼聲效 *鷹叫聲效 發生咩事！？你地做咩飛喺我身下面？ *鷹叫聲效 呢3隻獵鷹竟然唔係嚟攻擊我！其中兩隻飛到我身下面，用佢地身體同拍翼嘅力量頂住我！ 而另一隻就用佢一對鷹爪，爪實我隻右手，再不斷向上拍翼！佢地3隻獵鷹企圖減低我下跌嘅力量同速度！ 可惜佢地出現得太遲！同埋我實在由太高嘅位置跌落嚟，衝力太大，原本爪實我嘅獵鷹放棄，飛返上去山頂位置...而我同頂住我身體嘅另外兩隻獵鷹一齊跌咗落海！ *跌落海重擊聲效 我...好用力合實我個口...但都阻唔到海水湧入我個口度... 我...慢慢...抖唔到氣... *海豚叫聲漸近 *海豚由遠到近游水聲效 水面離我越嚟越遠...眼前嘅景像...好似越...嚟...越...黑... *海豚叫聲 （虛弱）係...海豚...仲有唔止一隻添...你地游緊過嚟...？你地...係咪嚟救我啊... *海豚叫聲 *龐大物種游水聲效 喂...海豚...你地做做咩突然游走咗啊...? 救我啊...救我上去啊... *鬚鯨聲效 突然...我眼前全黑...有一隻超大型！超大型嘅生物喺我上面出現！仲擋晒所有射入海洋嘅陽光！ 我用盡最後一口氣同力去轉身...跟住...我就見到嗰個超巨型嘅生物喺我面前！佢擘大口！將我同埋我身邊嘅所有事物都吞入佢嗰口入面！！！ 啊！！！ *海水衝撞聲效 *滴水聲效 即係！我依家身處嘅全黑空間！喺係呢個巨型生物嘅口入面？定係喺佢嘅胃入面！！！ *拍打聲效 喂！喂！放我出去啊！！！ 其實我知道自己點嗌...佢都無可能有反應...睇嚟距離死...只係時間嘅問題... 所以...我都放棄掙扎...瞓喺度等嗰刻嘅嚟臨... 但原來喺無光嘅地方，時間係過得好慢...好慢... (逐個數字讀） 1001…1002…1003… 1004…1005…1006… 1107…1208…1309… 1400… 明明只係幾分鐘...但感覺好似過咗好耐好耐咁... 而唔知過咗幾多個好耐之後... *巨口張開聲效 *海水流入聲效 慢慢有海入流入嚟，連帶有啲魚仔、海蝦同細小嘅海洋生物伴隨海水流緊入嚟！ 海水慢慢浸到我膝頭嘅位置。然後，喺前方2、3米嘅位置，慢慢有光滲緊入嚟！ 我即刻沿住光線嘅方向行過去，然後我摸到一堆又長又濕，質感好似樹根嘅鬍鬚！ 然後，喺呢堆鬍鬚竟然由中間位置，分上、下拉開！滲入嘅光線越嚟越多！眼前嘅景色越嚟越光！ *衝出水面聲效 *鬚鯨叫聲 出現喺我眼前嘅，係一大片嘅海洋！我即刻跳出原本黑暗嘅空間！ *落水聲效 *游水聲效 再不斷向前游！前面大概10米！有淺灘！ 快啲！再游快啲！ 我出盡全力！用最快嘅速度搶灘！ （喘氣）我終於都可以再踩到陸地啦！ 跟住我擰轉身，終於望到喺海入面吞咗我嘅大型生物嘅全相！ *鬚鯨叫聲 原來係一隻有20-30米嘅大型鯨魚！ *鬚鯨叫聲 *噴水聲效 Zip噏劇場 Game of Eden 第二季 小島篇 第64回「逃生」 彬臣 飾演 莫十三醫生 阿攝 飾演 阿達 Cfun 飾演 盧綠 編劇及製作 阿攝 音樂 BEAT FRIDAY（Camel, Four Hundred, Night, Stack, Surface, List, Extension, Half, Other Love） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

地點：封閉區域 Area DB Island 監控室 *開門聲效 K DB Island：莫十三醫生，覺得呢個封閉區域Area DB Island如何啊？ 莫十三：阿達可以發射激光，打死啲神獸，燒張黃紙又可以變返佢地出嚟，你地真係當呢個係遊戲啊？ K DB Island：咁人生都係一場遊戲，只係唔同世界有唔同設定啫。 莫十三：但盧零唔係想封閉區域Area DB Island維持現實世界嘅設定架咩？依家阿達合成咗一隻識飛嘅猩猩喎！點啊，玩緊數碼暴龍啊？定寵物小精靈啊？ K DB Island：話唔定現實即界真係出現過有翼嘅猩猩呢？莫菲斯醫生，你雖然活咗200年，但對於呢個世界，甚至呢個宇宙，都只係微塵。 莫十三：有翼嘅猩猩，《山海經》都無啦！等等先...你唔好話比我知容博士將Area Z嘅基因寶驗用咗喺... K DB Island：莫菲斯醫生，每個人都有唔同嘅崗位同能力，π先生就善於將大家嘅能力集合埋一齊，創造一個更好嘅世界。 莫十三：盧零、盧如都為同舟會付出咗咁多，點解π先生都唔放過佢地呢？ K DB Island：莫菲斯醫生，你呢啲係咪叫做「人之將死，其言也善」？ 莫十三：哈哈...AI嚟講，你都算係最好笑嗰個型號啦。 K DB Island：盧零、盧如，仲有被佢地殺咗嘅人嘅靈魂都得以喺呢度生活，加埋阿康遊戲編碼嘅技術，以及容博士基因工程嘅知識，先可以有呢家盧氏、裘氏、凱氏三大家族開枝散葉嘅情景。對於封閉區域嘅生命嚟講，呢度先喺真真實實嘅世界。所以，π先生無違背佢對盧零嘅承諾。 莫十三：咁阿達呢？佢無辜架喎。 K DB Island：咁你就要問返創造者康點解會留呢一個遊戲後門啦。 莫十三：今敏呢？佢知唔知呢件事？ K DB Island：放心，佢將π先生嘅命令同盧零嘅承諾都執行得好好。加上有你喺度，阿達又點會有事呢？好快就會到島之盡處，你會明白向死而生係咩意思。 地點：封閉區域 Area DB Island 千獸島 *獨角獸、猩猩、食人花叫聲 達：（讀白）喺巨型蘇木旁邊嘅山頂上面，經過幾輪嘅激戰之後，之前嘅大雨已經停咗。我、食人花同有翼嘅猩猩對戰獨角獸。但今次獨角獸無再召喚其他猛獸出嚟，而係一個單挑前世係凱猿嘅有翼猩猩，以及之前係凱花嘅食人花。 面對呢個世界嘅獸王獨角獸，食人花同猩猩都唔敢輕舉妄動，猩猩雙手拎住樹矛，遙指住獨角獸，而無法移動嘅食人花就不斷生出樹藤，以備不時之需。 *獨角獸叫聲 獨角獸撕叫一聲，拔足狂奔向猩猩！就喺佢同猩猩只係差幾個身位嘅時候，猩猩紮馬沉膝，將樹矛拉後，再扭腰，用盡全身嘅力量對獨角獸使出「寸刺」！ 正如盧綠所講，前世係凱氏武術高手嘅猩猩，呢一下寸刺無論喺角度、力度同時間都非常精妙！就算獨角獸跳起或者飛起，猩猩嘅寸刺都可以隨住獨角獸移動嘅方向，順勢追擊！點知，就喺獨角獸嘅身體差少少被刺中嘅一剎，佢4足用力，一個舜間橫移！就避開猩猩嘅攻擊！ 樹矛就喺獨角獸嘅翼旁邊幾CM嘅距離擦過！猩猩收唔切力，左邊身體暴露出空位！ 不過獨角獸都橫移得太大力，失咗重心，即將仆落地面！但獨角獸竟然伸直自己嘅右翼，直接用痴翼支撐自己嘅身體，再四腳一縮，再同時一彈，同晒四隻腳嘅力，將猩猩踢落山涯！ *猩猩被撞慘叫聲 獨角獸四腳加再一對翼並用，呢下用翼支撐身體再踢腳嘅動作，跟本同人類武術一模一樣！ 食人花完全反應唔切，眼見猩猩被踢飛落山涯，佢想伸出樹藤拉返猩猩上嚟！ 不過獨角獸無比機會佢！獨角獸飛起到離地5米嘅高度，向我衝過嚟！食人花即刻將十幾條樹藤改為伸到我身前，形成一個綠色保護罩！ 獨角獸突然喺半空做出一個旋轉360嘅動作，將自己對翼化成利器！用旋轉嘅力度硬生生幾樹藤形成嘅保護罩一分為二！ 獨角獸嘅動作已經唔可以用任何人或者動物嚟形容啦！ *拍翼聲效 好在猩猩同獵鷹合咗體，佢拍翼由山涯飛返嚟戰鬥現場，佢拎起兩嚿大石，瞄準獨角獸掟過去！ 但獨角獸好似知道巨石飛過嚟嘅路線咁，佢想飛去另一邊避開兩嚿巨石！ *樹藤聲效 *爆石聲效 食人花即刻生出兩條樹藤！打爆咗兩嚿巨石！巨石即刻變成石頭雨！ *拍翼聲效 喺空中嘅猩猩大力拍翼，產出巨大風力，將石頭雨加速！衝出獨角獸！ 獨角獸知道自己閃避唔切，所以將自己一對巨翼護喺自己身前，用自己一對翼擋住石頭雨！ *石頭衝擊聲效 眼見獨角獸將所有心神防守，將所有石頭全部擋格曬，呢個時候，我即刻向前跑！因為我對呢一場戰鬥唯一嘅貢獻就係我左手發出嘅死光！但大前提係我要掂到獨角獸嘅身體先可以！ 而極之聰明嘅食人花再次伸出樹藤到我背後，用力一推，幫我加速！ 但我懷疑獨角獸都有全知狀態！明明我喺佢身後，但佢都好似知道我想攻擊佢咁，所以佢即刻踢出後腳！而照呢個情況，好大機會係佢踢死我先過我掂到佢！ *拍翼聲效 猩猩即刻加速飛過嚟！ *揮矛聲效 佢揮出樹矛，向住獨角獸踢出嘅後腳斬過去！ *割肉聲效 獨角獸再次展現佢熟純控制身體嘅能力，即刻收腳，樹矛只係輕輕擦過佢嘅皮肉！ *獨角獸叫聲 獨角獸即刻轉身，正面對住我、猩猩同食人花！ *樹藤聲效 食人花伸出多條樹鞭！纏實獨角獸嘅四隻腳！同埋佢對翼！鎖死佢嘅動作！ *揮矛聲效 猩猩衝前用寸刺！攻向獨角獸嘅心臟位置！但獨角獸仲可以郁動佢條頸，用自己嘅角去硬碰！ *矛斷聲效 樹矛竟然被獨角獸嘅角撞斷咗！猩猩呆咗一秒，但呢一秒，足夠令獨角獸爭脫食人花樹藤嘅緊纏！所以猩猩即刻飛去獨角獸，將佢撲低，再使出近身格鬥嘅鎖技！雙手鎖實獨角獸條頸，雙腳纏實佢一對前腳！ *樹藤聲效 食人花伸出樹藤，綁實獨角獸其餘兩隻腳，其餘嘅樹藤就用盡力纏實獨角獸！ *獨角獸叫聲 獨角獸大聲撕叫 *猩猩叫聲 猩猩亦同時大叫！我即刻意會，因為如過錯過呢個猩猩同食人花千辛萬苦爭取返嚟嘅機會，應該無下一次！所以我即刻衝去丸角獸身前，左手掌心嘅光芒越嚟越強！因為我邊跑邊諗住一件事，就係 - 我要獨角獸消失！我要獨角獸消失！ *激光儲力聲效 而喺我左手掂到獨角獸身嘅肚，我發出前所未有咁強大嘅激光！激燒瞬速擴散到佢全身！但獨角獸無再撕叫，而係用一個哀怨嘅眼神望實我...獨光獸好快就喺我面前化成粉未... *吸受聲效 我拎起一張黃紙...黃紙吸受晒獨角獸嘅粉未...最後...變成一張畫有獨角獸嘅黃紙...而黃紙嘅背面...只係得兩行.. 40 - 81年 盧如 81 - 現在 獨角獸 盧如...盧如...呢個名咁熟嘅...係邊度聽過呢... 啊！盧如係盧零嘅喺666組織嘅同事！之後入咗嚟呢度同盧零一齊生活嘅盧如啊！如果係咁...係咪代表盧零...阿N…同其他往生嘅靈魂都存在喺呢個封閉區域？ Zip噏劇場 Game of Eden 第二季 小島篇 第63回「人與獸」 Alton 飾演 K DB Island 彬臣 飾演 莫十三醫生 阿攝 飾演 阿達 編劇及製作 阿攝 音樂 BEAT FRIDAY（Recharge, Surface, List, Kaji） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting

地點：封閉區域 Area DB Island 千獸島 達：（讀白）喺千獸島巨型蘇木旁邊嘅山頂上面，我、食人花同前世係封閉區域Area DB Island村民，盧綠叫佢做猿叔嘅猩猩，對戰由獨角獸號召過嚟4隻動物，分別係獅子、犀牛、熊人同喺高空上面盤旋嘅獵鷹。 以上咁多種生物，唔計獨角獸同食人花，如果以智商嚟排嘅話，猩猩智商大約係一個5歲小朋友嘅智力，喺動物嚟講排名最高，熊人嘅智力就等同一個3歲小朋友，萬獸之王嘅獅子只係得一歲到一歲半BB嘅智力，犀牛嘅智力雖然比佢地低，但佢聽覺非常敏銳，堅厚嘅犀牛皮加上時速高達40公里嘅速度，佢所產生嘅撞擊力會喺佢地之冠...而獵鷹嘅智慧係一眾鳥類排名前5…所以呢一戰...我都唔知結果會點... *白橡蛇矛聲效 不過當我見到前世係凱猿嘅猩猩執起盧綠嘅白橡蛇矛，再好純熟咁揮動之後，我就覺得自己嘅擔心係多餘嘅...因為呢度所有生物都有自己嘅靈魂顏色，佢地上一世都有可能係呢度嘅村民，好似食人花咁，佢地人類嘅記憶同經歷，加上動物嘅身體，產生出嚟嘅戰鬥力，已經唔係我呢個普通人可以想像...莫十三話Game of Eden唔係我想像中咁簡單，唔通佢指呢個封閉區域，同所有發生嘅事？ *犀牛叫聲 但我無時間諗呢方面嘅問題，聽覺超級靈敏嘅犀牛一聽到猩猩揮動白橡蛇矛嘅聲音之後，就刺激到佢，犀牛即刻向住猩猩狂奔過去！ *犀牛奔跑聲效 猩猩無硬碰，一個閃身避開佢嘅衝擊。 *獵鷹叫聲 呢個時候，獵鷹迅速飛去猩猩旁邊大叫一聲，佢無攻擊嘅意圖，純粹用聲音去指示猩猩嘅位置，比犀牛再去攻擊。 *樹鞭聲效 但食人花睇穿獵鷹嘅意圖，即逾飛出樹鞭趕走獵鷹，獵鷹即刻飛出食人花攻擊嘅範圍。同時，喺旁邊觀戰嘅獅子加入戰團，跑去攻擊食人花！ 食人花搖動自己嘅身體，震出一堆花粉！上次佢用花粉令盧綠陷入昏迷，唔通佢今次都想用花粉攻擊佢地？ *蝴蝶飛舞聲效 原來食人花震出嘅花粉，係用嚟吸引樹林入面嘅蝴蝶！一群應該有百隻嘅蝴蝶喺蘇木嗰邊飛過嚟，猩猩用口將花粉吹向犀牛，之後嗰堆蝴蝶就不斷圍住犀牛飛舞！一隻蝴蝶拍翼嘅聲效雖然好細，但有過百隻啲時候，再加上犀牛咁敏銳嘅聽覺，呢個另類嘅蝴蝶效應令到犀牛無晒方向感！呢一個百蝶圍犀牛嘅奇景，我估呢個世界應該無乜人睇過！之後蝴蝶隨住花粉飄往嘅方向飛動，一步一步飛到山涯邊，而失去方向感嘅犀牛，就一步一步行到去山涯，最後仲失足跌咗落去！ *犀牛跌落山涯聲效 呢個時候，猩猩唔駛分心應付犀牛，可以一心一意同獅子單挑！不過，獅子喺速度上佔優，佢不斷左右撲擊，猩猩根本無機會發揮融合咗玄武拳法嘅矛擊！而獅子喺一次嘅撲擊，除咗撲跌咗猩猩，仲想用尖齒咬擊猩猩嘅頸部，猩猩用白杖蛇矛嘅矛身檔格，但被獅子嘅咬擊咬斷咗白橡蛇矛！ *矛斷聲效 猩猩一腳踢開獅子！再執起斷開咗兩半嘅白杖蛇矛，變成左右手都有武器嘅攻擊手法，然後佢快速跑去啱啱跌落地嘅獅子，左右手不斷向獅子揮擊，專攻向獅子嘅四肢，令到獅子無辦法跳起！無得飛撲嘅獅子攻擊力大減！只能夠不斷向後退！ *獅子大叫 獅子大叫一聲，好似失去耐性咁，向前用力飛撲擊猩猩，而猩猩今次無閃避！用拎住斷矛嘅左手迎擊獅子，獅子一咬！我聽到骨折同爆血嘅聲音，但猩猩好似完全唔覺得痛咁，右手拎住前半段嘅白橡蛇矛插入獅子嘅腹部！再將獅子用力拋開！猩猩犧牲自己嘅左手，成功解決咗獅子啦！ *熊人叫聲 熊人智力果然有返咁上下，佢睇準猩猩受傷流血嘅時機，用力揮爪！爪傷咗猩猩嘅背部！猩猩大叫！然後跑向我面前... *下雨聲效 呢個時候…嗰天落起密密麻麻嘅雨粉… *行雷聲效 原本獵鷹不斷閃避食人花嘅樹鞭攻擊，但佢避唔到天空嘅雷擊！被雷一下劈中落地！暈咗喺我面前！ 食人花用樹鞭指一指我左手，我即時會意，內心諗住要獵鷹喺我面前消失！ *激光聲效 我左手掂住獵鷹！激光將獵鷹打到變成粉末！當我想用黃紙吸受獵鷹嘅時候，我見到身受重傷嘅猩猩，決定重復之前救猩猩嘅方法！然後左手掂住猩猩，內心諗住 - 猿叔，唔好意思…要你再死多一次啦！ 我左手再次發出激光，將猩猩射到粉碎，再一次過用黃紙同一時間吸晒猩猩同獵鷹嘅粉末！跟住神奇嘅事發生啦！ 嗰張黃紙變成一隻有翼嘅猩猩圖案！ 我再用身體檔住雨粉，即刻撻著一枝火柴！ *火柴聲效 黃紙一燒，就變出一隻有翼嘅猩猩！Game of Eden嘅世界，真係遠超我嘅想像！ 食人花伸出樹鞭，執起斷開嘅白橡蛇矛，用樹鞭綁實矛頭，然後樹鞭一斷！原來食人花喺用自身嘅樹鞭變成矛身，整成一枝全新嘅樹矛！再將矛遞去猩猩前面，猩猩再次純熟揮動蛇矛！ *熊人大叫 熊人見到有翼嘅猩猩即刻發狂！可惜，之前熊人可以用撲擊壓制猩猩嘅攻擊，但依家猩猩有一對巨翼！所以，喺熊人飛撲嘅時候，猩猩由原本嘅左右閃避，變成跳起！啊！係飛起先啱！ 熊人望住飛喺上空嘅猩猩，同我一樣，好似有種難以置信嘅時神... 猩猩雙手揸實樹矛，再喺半空拍翼，由上而下快速飛向熊人！熊人根本無可能閃避！樹矛喺電光火石之間，直插入熊人嘅心臟... 巨翼猩猩一招就解決咗熊人... 獨角獸由原本嘅5打3，變做得返佢最後一個！ 嚟啦！獨角獸！ *獨角獸叫聲 Zip噏劇場 Game of Eden 第二季 小島篇 第62回「決戰獨角獸」 阿攝 飾演 阿達 編劇及製作 阿攝 音樂 BEAT FRIDAY（BLANK, thing, Kaji, Ignorance） 封面設計 Followmelikeblack Leave a comment and share your thoughts: https://open.firstory.me/user/ckyhgwclu0xlr08721i22wc7k/comments Powered by Firstory Hosting